തിരുവനന്തപുരം: അര്ജന്റീന ഫുട്ബോള് താരം മെസ്സിയെ കേരളത്തിലേക്ക് കൊണ്ടുവരുന്നതുമായി ബന്ധപ്പെട്ട സാമ്പത്തിക ഇടപാടില് ജിഎസ്ടി വെട്ടിപ്പ് നടന്നുവെന്ന കണ്ടെത്തലില് മൂന്ന് ഉദ്യോഗസ്ഥര്ക്ക് ചാര്ജ് മെമോ. ജിഎസ്ടി കാഞ്ഞങ്ങാട് ഓഫീസിലെ ഇന്റലിജന്സ് ഓഫീസറടക്കം മൂന്ന് ഉദ്യോഗസ്ഥര്ക്കാണ് ചാര്ജ് മെമോ നല്കിയത്. റിപ്പോര്ട്ടര് ബ്രോഡ്കാസ്റ്റിങ് കമ്പനിക്ക് നല്കിയ നോട്ടീസില് തുടര്നടപടി വൈകിപ്പിച്ചതില് ജിഎസ്ടി കമ്മീഷണറുടേതാണ് നടപടി. കാഞ്ഞങ്ങാട് ജിഎസ്ടി ഇന്റലിജന്സ് ഓഫീസര് സജിനിക്കാണ് നിലവില് നോട്ടീസ് നല്കിയിരിക്കുന്നത്.
ഡെപ്യൂട്ടി കമ്മീഷണര്ക്കും ജോയിന്റ് കമ്മീഷണര്ക്കും ഉടനെ നോട്ടീസ് നല്കും. 2025 ജൂണില് 22.5 കോടി രൂപയുടെ ജിഎസ്ടി വെട്ടിപ്പ് സംബന്ധിച്ച് കമ്പനിക്ക് നോട്ടീസ് നല്കിയിട്ടും തുടര്നടപടിയെടുക്കാതെ വൈകിപ്പിച്ചത് ഉദ്യോഗസ്ഥരുടെ വീഴ്ചയാണെന്ന് അന്വേഷണത്തില് കണ്ടെത്തി. മത്സരം നടക്കാത്തതിനാല് സര്വീസ് നല്കിയിട്ടില്ലെന്നും ജിഎസ്ടി നല്കേണ്ടതില്ലെന്നുമാണ് കമ്പനിയുടെ വാദം. എന്നാല് മുന്കൂട്ടി ജിഎസ്ടി അടയ്ക്കുകയാണ് വേണ്ടതെന്നും മത്സരം നടന്നില്ലെങ്കില് പണം റീഫണ്ട് ചെയ്ത് നല്കുമെന്നുമാണ് ജിഎസ്ടി വകുപ്പിന്റെ നിലപാട്.
