ന്യൂഡല്ഹി : പബ്ജിക്ക് പിന്നാലെ ഇന്ത്യയിലേക്ക് തിരിച്ചുവരാനുള്ള നീക്കങ്ങള് സജീവമാക്കി ടിക്ക്ടോക്കും. ടിക്ക്ടോക്ക് ഇന്ത്യ ഹെഡ് നിഖില് ഗാന്ധി ജീവനക്കാര്ക്ക് അയച്ച കത്തിലാണ് ഇക്കാര്യം സൂചിപ്പിച്ചിരിക്കുന്നത്. ഇന്ത്യയിലേക്കുള്ള തിരിച്ചു വരവിനായി ഡേറ്റാ സുരക്ഷയും സെക്യൂരിറ്റിയും വര്ധിപ്പിക്കുന്നതിനുള്ള നീക്കങ്ങള് കമ്പനി ആരംഭിച്ചതായും കത്തില് പറയുന്നു.
ഇക്കഴിഞ്ഞ ദിവസമാണ് പബ്ജി ഇന്ത്യയില് തിരികെ എത്തുമെന്ന് ഗെയിം ഡെവലപ്പര്മാരായ പബ്ജി കോര്പ്പറേഷന് ഔദ്യോഗികമായി അറിയിച്ചത്. ഇന്ത്യന് ഉപയോക്താക്കള്ക്കു വേണ്ടി പ്രത്യേകം വികസിപ്പിച്ച ഗെയിം ആണിത് എന്നാണ് അധികൃതര് അറിയിക്കുന്നത്. ഉപയോക്താക്കളുടെ വ്യക്തിഗത വിവരങ്ങളുടെ സുരക്ഷയും പബ്ജി കോര്പ്പറേഷന് ഉറപ്പുനല്കുന്നു.
ഇതിന് പിന്നാലെയാണ് ടിക്ക്ടോക്കും തിരിച്ചെത്തുമെന്നുള്ള റിപ്പോര്ട്ടുകള് പുറത്തുവരുന്നത്. ഡേറ്റാ സുരക്ഷയ്ക്കായി രാജ്യത്തുള്ള നിയമങ്ങള്ക്കുള്ളില് നിന്നാകും പ്രവര്ത്തനം. ഇന്ത്യയില് ടിക്ക്ടോക്കിന് വലിയ വളര്ച്ച നേടാനാകുമെന്നും ടിക്ക്ടോക്ക് ഇന്ത്യ ഹെഡ് നിഖില് ഗാന്ധി പറയുന്നു. ജൂണിലാണ് ടിക്ക്ടോക്ക് അടക്കമുള്ള 58 ആപ്ലിക്കേഷനുകള് ഇന്ത്യയില് നിരോധിച്ചത്.
