1839 ഓഗസ്റ്റ് 19ന് ഫ്രഞ്ച് ഗവണ്മെന്റ് ഫോട്ടോഗ്രാഫിയുടെ ആദിമ രൂപങ്ങളില് ഒന്നായ ഡൈഗ്രോടൈപ്പ് ഫോട്ടോഗ്രാഫി ലോകത്തിന് സമര്പ്പിച്ചതിന്റെ ഓര്മ്മ പുതുക്കുന്നതിന് വേണ്ടിയാണ് എല്ലാ വര്ഷവും ഈ ദിനം ലോക ഫോട്ടോഗ്രാഫി ദിനമായി ആചരിക്കുന്നത്. ഫോട്ടോഗ്രഫി മേഖലയ്ക്ക് വലിയൊരു കുതിപ്പാണ് അന്ന് ഫ്രാന്സ് സമ്മാനിച്ചത്. ഫ്രഞ്ച് കലാകാരനായ ലൂയി ഡൈഗ്രോയാണ് ഡൈഗ്രോടൈപ്പ് എന്ന ആശയം ആദ്യമായി കൊണ്ടുവന്നത്. ഫോട്ടോഗ്രഫിയുടെ സ്ഥാപകരിലൊരാളായാണ് ലൂയിയെ ലോകം കണക്കാക്കുന്നത്.
ലോകത്തിലാദ്യമായി ക്യാമറയിലൂടെ ഒരു ചിത്രമെടുത്തത് ഫ്രഞ്ചുകാരനായ ജോസഫ് നീസിഫോര് നെയ്പ്സ് ആണ്. 1826-ല് ഫ്രാന്സിലെ ബര്ഗണ്ടിയില് വെച്ച് തന്റെ വീടിന്റെ മുകള്ഭാഗത്തുനിന്നുമാണ് അദ്ദേഹം ലോകത്തിലെ ആദ്യ ചിത്രം ക്യാമറയില് പകര്ത്തിയത്. ലോകത്ത് ഇന്നേവരെ ഉണ്ടായിട്ടുള്ള ശാസ്ത്ര നേട്ടങ്ങളില് ഏറ്റവും പ്രാധാന്യം അര്ഹിക്കുന്ന ഒന്നാണ് ഫൊട്ടോഗ്രഫി. പലപ്പോഴും ഒറ്റ ക്ലിക്കിലൂടെ ഒരുപാട് കാര്യങ്ങള് ഓരോ ഫോട്ടോയ്ക്കും പറയാനുണ്ട്. ലോകത്തിന്റെ ഏതു കോണില് നടക്കുന്ന ചെറു ചലനങ്ങള് പോലും വീട്ടിലെ ടിവി സ്ക്രീനില് തത്സമയം ദര്ശിക്കുന്ന തലം വരെ ഫോട്ടോഗ്രാഫി വളര്ന്നിരിക്കുന്നു.
