കാസര്കോട് : ശ്വാസനാളത്തില് വണ്ട് കുടുങ്ങി ഒന്നര വയസ്സുകാരന് ദാരുണാന്ത്യം. കാസര്കോട് നുള്ളിപ്പാടി ചെന്നിക്കരയില് സത്യേന്ദ്രന് – രഞ്ജിനി ദമ്പതികളുടെ മകന് എസ് അന്വേദ് ആണ് ശ്വാസം മുട്ടി മരിച്ചത്. വീട്ടിനകത്ത് കളിച്ച് കൊണ്ടിരിക്കെ ശനിയാഴ്ച വൈകിട്ട് ആറോടെ കുട്ടി കുഴഞ്ഞു വീണ് ബോധരഹിതനാവുകയായിരുന്നു. കാസര്കോട് ജനറല് ആശുപത്രിയില് എത്തിച്ചപ്പോഴേക്കും മരിച്ചിരുന്നു. പരിശോധനയില് മരണകാരണം കണ്ടത്താനായില്ല.
ഭക്ഷണം തൊണ്ടയില് കുടുങ്ങിയതാണെന്നാണ് ആദ്യം കരുതിയത്. എന്നാല് മൃതദേഹം ഞായറാഴ്ച പോസ്റ്റ്മോര്ട്ടം ചെയ്തപ്പോഴാണ് ശ്വാസനാളത്തില് ചെറിയ വണ്ട് കുടുങ്ങി കിടക്കുന്നത് കണ്ടത്തിയത്. ചത്ത വണ്ടിനെ പുറത്തെടുത്തു. കാസര്കോട് ടൗണ് പോലിസ് ഇന്ക്വസ്റ്റ് നടത്തിയ മൃതദേഹം ചെന്നിക്കര പൊതുശ്മാശനത്തില് സംസ്കരിച്ചു. ഋത്വേദ് സഹോദരനാണ്.
