പത്തനംതിട്ട : പത്തനംതിട്ട നഗരത്തിലെ ഓടയിലെ മണ്ണ് നീക്കം ചെയ്തപ്പോള് കണ്ടെത്തിയത് കക്കൂസ് മാലിന്യം. നഗര ഹൃദയത്തില് സ്ഥിതി ചെയ്യുന്ന വെജിറ്റേറിയന് ഹോട്ടലിന് മുന്നിലെ ഓടയിലെ മണ്ണ് നീക്കിയപ്പോഴാണ് കക്കൂസ് മാലിന്യം കണ്ടെത്തിയത്. നഗരത്തിലെ ഓടകള്ക്കുള്ളില് വ്യാപാര സ്ഥാപനങ്ങളില് നിന്നുമാണ് കക്കൂസ് മാലിന്യം എത്തിയത് എന്നും കണ്ടെത്തി. പത്തനംതിട്ട നഗരത്തിലെ പല ഭാഗത്തും ഓടകള് വൃത്തിയാക്കാതെയാണ് കിടക്കുന്നത്. ഇതിനാല് തന്നെ ഈ ഓടകളില് എന്തൊക്കെ മാലിന്യങ്ങള് വന്നു ചേരുന്നു എന്നത് ആര്ക്കും അറിയില്ല. മഴക്കാലത്തിന് മുന്പ് തന്നെ നഗരത്തിലെ ഓടകള് വൃത്തിയാക്കേണ്ടിയിരുന്നിട്ടും പത്തനംതിട്ട നഗരസഭ ഈ വിഷയത്തില് നടപടി സ്വീകരിച്ചില്ല.
പത്തനംതിട്ട നഗരത്തില് കക്കൂസ് മാലിന്യം സംസ്കരിക്കാന് സംവിധാനങ്ങള് ഇല്ലാത്തതും വലിയ പ്രതിസന്ധി സൃഷ്ടിക്കുന്നു. നഗരത്തിലെ മാലിന്യങ്ങള് നഗരത്തിലെ സ്വകാര്യ ബസ് സ്റ്റാന്റിനോട് ചേര്ന്ന് ഒഴുകുന്ന തോട്ടിലേക്കാണ് പതിക്കുന്നത്. കക്കൂസ് മാലിന്യങ്ങള് കലര്ന്ന ഓടയിലെ വെള്ളം ജലാശയങ്ങളില് കോളിഫോം ബാക്സ്ടീരിയയുടെ വര്ധനവിന് കാരണമാവുകയും ഇത് ജനങ്ങളില് ഗുരുതരമായ രോഗങ്ങള്ക്ക് കാരണമായി തീരുകയും ചെയ്യും. മാലിന്യം തള്ളുന്ന നഗരത്തിലെ ഹോട്ടലുകള് അടക്കമുള്ള സ്ഥാപനങ്ങള്ക്ക് എതിരെ കര്ശന നടപടി സ്വീകരിക്കാന് ആരോഗ്യ വകുപ്പ് അധികൃതര് തയ്യാറാകേണ്ടത് ആവശ്യമാണ്.
