കൊല്ലം : മൈനാഗപ്പള്ളിയിൽ ലോറി നിയന്ത്രണം വിട്ട് മറിഞ്ഞ് ഇരുചക്രവാഹന യാത്രക്കാരന് ഗുരുതരമായി പരിക്കേറ്റു. മൈനാഗപ്പള്ളി സ്വദേശിയായ അബ്ദുൽ സലാമിനാണ് അപകടത്തിൽ ഗുരുതരമായി പരിക്കേറ്റത്. കരുനാഗപ്പള്ളി – ശാസ്താംകോട്ട റോഡിൽ മൈനാഗപ്പള്ളി കുറ്റിമുക്ക് ജംഗ്ഷനിൽ ഇന്ന് പുലർച്ചെ അഞ്ചരയോടെയായിരുന്നു അപകടം നടന്നത്. തമിഴ്നാട്ടിൽ നിന്നും തക്കാളിയുമായി വന്ന ലോറി നിയന്ത്രണം വിട്ട് ഇലക്ട്രിക് പോസ്റ്റിലും അബ്ദുൽ സലാം സഞ്ചരിച്ചിരുന്ന സ്കൂട്ടറിലും ഇടിച്ച് മറിയുകയായിരുന്നു. തന്റെ മകനെ റെയിൽവേ സ്റ്റേഷനിൽ കൊണ്ടുപോയി വിട്ടശേഷം വീട്ടിലേക്ക് മടങ്ങുകയായിരുന്നു അബ്ദുൽ സലാം. നിയന്ത്രണം വിട്ട ലോറി അബ്ദുൽ സലാമിന്റെ ദേഹത്തേക്കാണ് മറിഞ്ഞത്.
അപകടം നടന്ന ഉടൻ തന്നെ നാട്ടുകാർ ചേർന്ന് അബ്ദുൽ സലാമിനെ ശാസ്താംകോട്ടയിലെ സ്വകാര്യ ആശുപത്രിയിൽ പ്രവേശിപ്പിച്ചു. അദ്ദേഹത്തിന്റെ പരിക്ക് ഗുരുതരമാണെന്നാണ് ലഭിക്കുന്ന വിവരം. ലോറി ഡ്രൈവർക്കും അപകടത്തിൽ നിസ്സാര പരിക്കുകൾ പറ്റിയിട്ടുണ്ട്. മറ്റാർക്കും അപകടത്തിൽ പരിക്കുകൾ റിപ്പോർട്ട് ചെയ്തിട്ടില്ല.
