തിരുവനന്തപുരം : ഈദുല് ഫിത്തര് പ്രമാണിച്ച് മെയ് 3 ന് സര്ക്കാര് പൊതു അവധി പ്രഖ്യാപിച്ചതിനാല് പി.എസ്.സി നാളെ നടത്താന് നിശ്ചയിച്ചിരുന്ന സര്ട്ടിഫിക്കറ്റ് വെരിഫിക്കേഷന്, സര്വ്വീസ് വെരിഫിക്കേഷന് എന്നിവ മാറ്റിവെച്ചിരിക്കുന്നു. പുതുക്കിയ തീയ്യതി പിന്നീട് അറിയിക്കുന്നതാണ്. നാളെ നടത്താന് നിശ്ചയിച്ചിരുന്ന അകൗണ്ട് ടെസ്റ്റ് ഫോര് എക്സിക്യൂട്ടിവ് ഓഫിസര് വകുപ്പുതല പരീക്ഷ മെയ് 9 ലേക്ക് മാറ്റിവെച്ചു. ചെറിയ പെരുന്നാള് പ്രമാണിച്ച് സംസ്ഥാനത്ത് നാളെയും അവധിയാണ്.
സര്ക്കാര് സ്ഥാപനങ്ങള്ക്കും വിദ്യാഭ്യാസ സ്ഥാപനങ്ങള്ക്കും അവധി ആയിരിക്കും. എല്ലാ സര്ക്കാര് സ്ഥാപനങ്ങള്ക്കും വിദ്യാഭ്യാസ സ്ഥാപനങ്ങള്ക്കും ബാങ്കുകള്ക്കും നാളെയും അവധി നല്കുമെന്ന് സര്ക്കാര് അറിയിച്ചു. നെഗോഷ്യബിള് ഇന്സ്ട്രുമെന്റ് ആക്ട് പ്രകാരമാണ് അവധി പ്രഖ്യാപിച്ചത്. ചെറിയ പെരുനാള് ഇന്നായിരിക്കുമെന്ന് കരുതി ഇന്നത്തെ അവധി സര്ക്കാര് നേരത്തെ പ്രഖ്യാപിച്ചിരുന്നു. ഇന്നലെ മാസപിറവി കാണാത്തതിനാല് ചെറിയ പെരുന്നാള് നാളേക്ക് മാറിയെങ്കിലും ഇന്നത്തെ അവധി തുടരാന് തീരുമാനിക്കുകയായിരുന്നു.
ശവ്വാല് മാസപിറവികാണാത്തതിനാല് സംസ്ഥാനത്ത് ചൊവ്വാഴ്ചയാണ് ചെറിയ പെരുന്നാള് ആഘോഷിക്കുന്നത്. ശവ്വാല് മാസപ്പിറവി കാണാത്തതിനാല് റമദാന് മുപ്പത് പൂര്ത്തിയാക്കി മറ്റന്നാള് ചെറിയ പെരുന്നാളായിരിക്കുമെന്ന് വിവിധ ഇസ്ലാം മത പണ്ഡിതരും ഖാസിമാരും ഇന്നലെ അറിയിച്ചു. പാണക്കാട് സയിദ് സാദിഖലി തങ്ങള്, കാന്തപുരം എ.പി അബൂബക്കര് മുസ്ല്യാര്, കേരള ഹിലാല് കമ്മിറ്റി ചെയര്മാന് എം.മുഹമ്മദ് മദനി, കോഴിക്കോട് വലിയ ഖാസി മുഹമ്മദ് കോയ തങ്ങള് ജമുല്ലൈലി തുടങ്ങിയവര് ഇക്കാര്യം അറിയിച്ചത്. അതേസമയം, ഒമാനില് ശവ്വാല് മാസപ്പിറവി കണ്ടതിനാല് ഇന്നാണ് ഈദുല് ഫിത്വര് ആഘോഷിക്കുന്നത്. സൗദിയിലും യുഎഇയിലും തിങ്കളാഴ്ച തന്നെയാണ് ചെറിയ പെരുന്നാള് ആഘോഷിക്കുന്നത്.
