മല്ലപ്പള്ളി : ചുങ്കപ്പാറ – ആലപ്രക്കാട് റോഡിൽ വഴി വിളക്ക് സ്ഥാപിക്കണമെന്ന ആവശ്യം ശക്തമാകുന്നു. കോട്ടാങ്ങൽ പഞ്ചായത്തിലെ ഗ്രാമീണ റോഡുകളിലെല്ലാം വഴി വിളക്ക് പ്രകാശിപ്പിച്ചിട്ടും പ്രധാന പൊതുമരാമത്ത് റോഡായ ചങ്കപ്പാറ – ആലക്കാട് റോഡിനെ അധികൃതർ അവഗണിക്കുകയാണെന്നാണ് നാട്ടുകാരുടെ പരാതി. എട്ടും ഒന്പതും വാര്ഡുകളിലൂടെ കടന്നുപോകുന്ന ഒന്നര കിലോമീറ്റർ ദൂരം മാത്രമാണ് വഴി വിളക്കില്ലാത്തത്. മറ്റ് വാർഡുകൾ തുടങ്ങുന്ന ഭാഗങ്ങളിൽ വഴി വിളക്കുകൾ സ്ഥാപിച്ചിട്ടുണ്ട്.
റബർ തോട്ടങ്ങൾ നിറഞ്ഞ പ്രദേശമായതിനാൽ സന്ധ്യ ആകുമ്പോൾ തന്നെ ഇരുട്ടിൽ മൂടുന്ന അവസ്ഥയാണ്. വഞ്ചികപ്പാറ, ആലക്കോട് പ്രദേശങ്ങളിലേക്കുള്ള നിരവധി കാൽനടയാത്രക്കാരാണ് ഇതുമൂലം ദുരിതമനുഭവിക്കുന്നത്. ഇഴജന്തുക്കളുടെയും തെരുവ് നായ്ക്കളുടെയും കുറുക്കന്റെയും ശല്യം പ്രദേശത്ത് ഏറി വരുകയാണ്. ഇവിടെ വഴിവിളക്ക് സ്ഥാപിക്കണമെന്ന ആവശ്യത്തിന് പഴക്കം ഏറെയുണ്ടെങ്കിലും ബന്ധപ്പെട്ട ഉദ്യോഗസ്ഥരുടെയും ജനപ്രതിനിധിയുടെയും ഭാഗത്തുനിന്നും ഒരു നടപടിയും ഉണ്ടാകുന്നില്ലെന്ന് നാട്ടുകാര് പറയുന്നു.
