കുമ്പഴ: പുനലൂര് – മൂവാറ്റുപുഴ ഹൈവേയിലെ തിരക്കേറിയ കുമ്പഴ ജംഗ്ഷനില് ട്രാഫിക് സിഗ്നല് ലൈറ്റുകള് സ്ഥാപിക്കുവാന് പൊതുമരാമത്ത് എക്സിക്യൂട്ടീവ് എഞ്ചിനീയര്ക്ക് അബിന് വര്ക്കി എം.എല്.എ നിര്ദേശം നല്കി. കുമ്പഴ സ്വദേശി അഖില് സന്തോഷ് ആറന്മുള എം.എല്.എ അബിന് വര്ക്കിക്ക് നല്കിയ പരാതിയെ തുടര്ന്നാണ് നടപടി. ദിനംപ്രതി അപകടങ്ങള് നടക്കുന്ന കുമ്പഴ ജംഗ്ഷനില് ട്രാഫിക് സിഗ്നല് സ്ഥാപിക്കണമെന്നത് ജനങ്ങളുടെ ദീര്ഘനാളായുള്ള ആവശ്യമായിരുന്നു. മലയാലപ്പുഴ – കുമ്പഴ റോഡും തിരുവല്ല – കുമ്പഴ റോഡും പുനലൂര് – മൂവാറ്റുപുഴ സംസ്ഥാന പാതയില് സംഗമിക്കുന്ന സ്ഥലമാണ് കുമ്പഴ ജംഗ്ഷന്. നാല് റോഡില്നിന്നും വരുന്ന വാഹനങ്ങള് കുമ്പഴയില് എത്തുമ്പോള് വലിയ ഗതാഗതക്കുരുക്കാണ് അനുഭവപ്പെടുന്നത്.
ട്രാഫിക് സിഗ്നല് സംവിധാനം ഇല്ലാത്തതിനാല് അമിത വേഗതയില് വാഹനങ്ങള് കടന്നുപോകുന്നതും അപകടങ്ങള് നടക്കുന്നതും ഇവിടെ പതിവാണ്. പോലീസാണ് ഇവിടെ വാഹനങ്ങള് നിയന്ത്രിക്കുന്നത്. നിരവധി സ്കൂള്, കോളേജ് ബസ്സുകള് രാവിലെയും വൈകുന്നേരങ്ങളിലും ഇതുവഴി കടന്നുപോകുന്നുണ്ട്. രൂക്ഷമായ ഗതാഗത കുരുക്കാണ് ഈ സമയം ഇവിടെ അനുഭവപ്പെടുന്നത്. ശബരിമല അയ്യപ്പ ഭക്തര് ഉള്പ്പടെ കടന്നുപോകുന്ന കുമ്പഴ ജംഗ്ഷനില് ട്രാഫിക് സിഗ്നല് ലൈറ്റുകള് സ്ഥാപിക്കണമെന്ന ആവശ്യത്തിന് കാലങ്ങളുടെ പഴക്കമുണ്ട്. അപകടങ്ങള് നടന്നാല് സി.സി.റ്റി.വി ക്യാമറകള് പോലുമില്ല. ഈ ഭാഗത്തെ അപകടങ്ങള് കുറയ്ക്കുന്നതിനായി റോഡില് സ്ഥാപിച്ച ഡിവൈഡര് സ്റ്റമ്പുകളും വാഹനങ്ങള് കയറിയിറങ്ങി നശിച്ചു കഴിഞ്ഞു.
