ബംഗ്ലാംകടവ് : ഇട്ടിയപ്പാറ–ഒഴുവൻപാറ–ജണ്ടായിക്കൽ–ബംഗ്ലാംകടവ് റോഡിലെ യാത്ര ദുരിതമാകുന്നു. ബിഎം ബിസി നിലവാത്തിൽ ടാറിങ് നടത്താൻ കരാറായ റോഡാണിത്. ജൽ ജീവൻ മിഷന്റെ പൈപ്പുകളിടുന്ന പണികൾ പൂർണമാകാത്തതും കെഎസ്ഇബി വടശേരിക്കര സെക്ഷന്റെ പരിധിയിലെ വൈദ്യുതി തൂണുകൾ വശങ്ങളിലേക്കു മാറ്റാത്തതുമാണു വികസനത്തിനു തടസ്സം. റോഡ് പണികൾ ആരംഭിച്ചിട്ട് 2 വർഷത്തോളമാകുന്നു. ഇതുവരെ ഇട്ടിയപ്പാറ–ഒഴുവൻപാറ വരെ 4 കലുങ്കുകളും ജണ്ടായിക്കൽ–കിടങ്ങുമൂഴി വരെ 17 കലുങ്കുകളും നിർമിച്ചു.
ജണ്ടായിക്കൽ–കിടങ്ങുമൂഴി വരെ പലയിടങ്ങളിലായി 500 മീറ്ററോളം വശം കെട്ടി ബലപ്പെടുത്തി. കൽക്കെട്ടിനു മുകളിൽ തൂണുകൾ നാട്ടുന്ന പണികൾ പൂർണമായിട്ടില്ല. കിടങ്ങുമൂഴി–ബംഗ്ലാംകടവു വരെ കാര്യമായ പണികൾ നടത്തിയിട്ടില്ല. 2 കലുങ്കുകൾ ഭാഗികമായി നിർമിച്ചു. എ വൺ പടിക്കും ബംഗ്ലാംകടവ് സ്കൂളിനും മധ്യത്തിലായി 4 ഇടത്തു സംരക്ഷണഭിത്തി നിർമാണം നടക്കുന്നുണ്ട്. വിരലിൽ എണ്ണാവുന്ന പണിക്കാരാണുള്ളത്. അവരെ വെച്ചാണ് ഇത്രയും പണികൾ ചെയ്തത്.
