തിരുവനന്തപുരം : സംസ്ഥാന ട്രഷറി സോഫ്റ്റ് വെയറില് വീണ്ടും പിഴവ്. തിരുവനന്തപുരം കടയ്ക്കാവൂര് ട്രഷറിയില് സ്ഥിര നിക്ഷേപമിട്ടയാള്ക്ക് ഇത് പിന്വലിച്ചപ്പോള് ഒന്നര ലക്ഷത്തോളം രൂപ അധികമായി അക്കൗണ്ടിലെത്തി. തിരുവനന്തപുരം ജില്ലാ ട്രഷറിയിലും വീഴ്ചയുണ്ടായി. എന്നാല് ഡാറ്റാ എന്ട്രിയിലെ പിശക് മാത്രമാണെന്നാണ് ട്രഷറി ഡയറക്ടറേറ്റിന്റെ വിശദീകരണം.
തിരുവനന്തപുരം കടയ്ക്കാവൂര് ട്രഷറിയിലും ജില്ല ട്രഷറിയിലുമാണ് സോഫ്റ്റ് വെയര് പിഴവ് കാരണം അധിക തുക ഇടപാടുകാരുടെ അക്കൗണ്ടുകളിലെത്തിയത്. കടയ്ക്കാവൂരില് സ്ഥിര നിക്ഷേപമിട്ടയാള്ക്ക് ഇത് പിന്വലിച്ചപ്പോള് 1,47000 രൂപ അധികമായി അക്കൗണ്ടിലെത്തി. നിക്ഷേപത്തിന്റെ കാലാവധി 365 ദിവസം എന്നതിനുപകരം 365 ആഴ്ച എന്നായി രേഖപ്പെടുത്തി. ഇതേതുടര്ന്ന് എഫ്ഡി അക്കൗണ്ടില് നിന്ന് പണം ഓണ്ലൈനായി സേവിംങ്സ് അക്കൗണ്ടിലേക്ക് മാറ്റിയപ്പോഴാണ് സംഭവം.
ജനുവരി അവസാനവാരമുണ്ടായ വീഴ്ച രഹസ്യമായി വെച്ചിരിക്കുകയായിരുന്നു. എന്നാല് ഡാറ്റാ എന്ട്രിയില് ജീവനക്കാരന് വന്ന പിശകാണെന്നും പണം നഷ്ടപ്പെട്ടിട്ടില്ലെന്നുമാണ് കടയ്ക്കാവൂര് ട്രഷറി അധികൃതരുടെ വിശദീകരണം. മരിച്ചയാളുടെ നോമിനിക്ക് പണം കൈമാറിയപ്പോഴാണ് തിരുവനന്തപുരം ജില്ലാ ട്രഷറിയില് സോഫ്റ്റ് വെയര് വീഴ്ചയുണ്ടായത്. 148000 രൂപ കൈമാറേണ്ട സ്ഥാനത്ത് 152000 രൂപ കൈമാറി.
വഞ്ചിയൂരില് ട്രഷറി സോഫ്റ്റ്വെയര് പിഴവ് മറയാക്കിയുള്ള തട്ടിപ്പ് നടന്നതിന് ശേഷം ഇത് അഞ്ചാം തവണയാണ് സമാനമായ തട്ടിപ്പ് സംസ്ഥാനത്ത് നടക്കുന്നത്. എന്നാല് ട്രഷറി ഡയറക്ടറേറ്റിന്റെ മേല്നോട്ടത്തിലുള്ള സോഫ്റ്റ്വെയറിലെ പിഴവു പരിഹരിക്കാനോ ഉന്നത ഉദ്യോഗസ്ഥര്ക്കെതിരെ കര്ശന നടപടി സ്വീകരിക്കാനോ ധനവകുപ്പ് ഇപ്പോഴും തയ്യാറായിട്ടില്ല.
