തിരുവല്ല : കനത്ത മഴയില് റോഡിലേക്ക് വീണ മരം വെട്ടിമാറ്റുന്നതിനെചൊല്ലിയുണ്ടായ തര്ക്കത്തിനൊടുവില് അയല്വാസിയെ വെട്ടിയ കേസില് പ്രതി അറസ്റ്റില്. തേവേരി പള്ളിവിരുത്തിയില് വീട്ടില് ജോളി എന്നു വിളിക്കുന്ന തോമസ് വി ഉമ്മന് (56) നെയാണ് പുളിക്കീഴ് പോലീസ് അറസ്റ്റ് ചെയ്തത്. പുളിന്തറ വീട്ടില് സതീഷ് കുമാര് ( 47 ) നെ വെട്ടിപ്പരിക്കേല്പ്പിച്ച സംഭവത്തിലാണ് അറസ്റ്റ്.
ഇന്ന് രാവിലെ പതിനൊന്നരയോടെ ആയിരുന്നു സംഭവം. തോമസ് വി ഉമ്മന്റെ പുരയിടത്തില് നിന്നിരുന്ന ആഞ്ഞിലി മരം ഇന്നലെ രാത്രി റോഡിലേക്ക് കടപുഴകി വീണിരുന്നു. ഇത് വെട്ടിമാറ്റാനായി ഇന്ന് രാവിലെ പത്തരയോടെ തിരുവല്ലയില് നിന്നുള്ള അഗ്നി ശമന സേന എത്തി. മരം മുറിച്ചു നീക്കുന്നതിന് തോമസ് തടസം പറഞ്ഞു. സംഭവത്തില് ഇടപെട്ട വാര്ഡ് മെമ്പറെ തോമസ് അസഭ്യം പറഞ്ഞു. ഇത് ചോദ്യം ചെയ്ത സതീഷിനെ തോമസ് വെട്ടുകത്തി ഉപയോഗിച്ച് വെട്ടുകയായിരുന്നു. തലയ്ക്ക് സാരമായി പരിക്കേറ്റ സതീശനെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചു. ഇരുവരും തമ്മില് മുന് വൈരാഗ്യം നിലനിന്നിരുന്നതായി പോലീസ് പറഞ്ഞു.
