അഗളി: അട്ടപ്പാടി കക്കുപ്പടിയില്‍ ദുരൂഹ സാഹചര്യത്തില്‍ സ്ത്രീയുടെ മൃതദേഹം കിണറ്റില്‍ നിന്നും കണ്ടെടുത്തു. തമിഴ്‌നാട് സ്വദേശിയായ സെല്‍വിയുടെ (39) മൃതദേഹമാണു താഴെ കക്കുപ്പടി ഊരിനടുത്തു സ്വകാര്യ വ്യക്തിയുടെ വീടിനോടു ചേര്‍ന്ന കിണറ്റില്‍ കണ്ടെത്തിയത്. നെറ്റിയിലും വയറിലും മുറിവുള്ളതിനാല്‍ കൊലപാതകമാണെന്നു സംശയിക്കുന്നതായി പോലീസ് പറഞ്ഞു.
സെല്‍വിയോടൊപ്പം താമസിച്ചിരുന്ന ഹംസ എന്നയാളെ കസ്റ്റഡിയിലെടുത്തെന്നാണു സൂചന. ഏതാനും വര്‍ഷമായി പാടവയലില്‍ വാടകയ്ക്കു താമസിക്കുകയായിരുന്നു ഇരുവരും. കഴിഞ്ഞ ഞായറാഴ്ചയാണ് കക്കുപ്പടിയിലെ വീട് വാടകയ്ക്ക് എടുത്തതെന്നു പോലീസ് പറഞ്ഞു. ഇന്നലെ രാവിലെ സമീപവാസികളാണു മൃതദേഹം കണ്ടത്. അഗളി എഎസ്‌പി പതംസിങ്, ഇന്‍സ്‌പെക്ടര്‍ സുനില്‍ കൃഷ്ണന്‍ എന്നിവരുടെ നേതൃത്വത്തില്‍ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.
