വയനാട്: സര്ക്കാര് വിദ്യാലയത്തിലെ ആദിവാസി വിദ്യാര്ത്ഥികളെ കൊല്ലത്തെ സ്വകാര്യ സ്കൂളിലേക്ക് മാറ്റാന് നീക്കം. വയനാട് വെള്ളമുണ്ട പഞ്ചായത്തിലെ വാരാമ്പറ്റ ഗവ. ഹൈസ്കൂളില്നിന്നാണ് രക്ഷിതാക്കളെ സ്വാധീനിച്ച് വിദ്യാര്ഥികളെ കടത്താനുള്ള ശ്രമം. കൊല്ലം പാരിപ്പള്ളിയിലെ അണ്എയ്ഡഡ് സ്കൂള് അധികൃതര് 35 വിദ്യാര്ത്ഥികളുടെ രക്ഷിതാക്കളെക്കൊണ്ട് ടിസിക്ക് അപേക്ഷ നല്കിച്ചിരിക്കുകയാണ്. അഞ്ച് മുതല് 10വരെ ക്ലാസുകളിലുള്ള ആണ്കുട്ടികളും പെണ്കുട്ടികളുടെയും ടിസിക്കാണ് സ്കൂളില് അപേക്ഷ നല്കിയിട്ടുള്ളത്.
വെള്ളമുണ്ടയിലെ വാളാരംകുന്ന്, കൊയറ്റുപാറ, നരിപ്പാറ, അംബേദ്കര് കോളനികളിലുള്ളവരാണ് കുട്ടികളെല്ലാം. ഈ കോളനികളില്നിന്ന് നാല് കിലോമീറ്ററേ വാരാമ്പറ്റ സ്കൂളിലേക്കുള്ളൂ. രക്ഷിതാക്കളെ പ്രലോഭിപ്പിച്ചാണ് വിദ്യാര്ഥികളെ കൊണ്ടുപോകുന്നതെന്നാണ് ആക്ഷേപം. തീര്ത്തും ഗ്രാമീണ അന്തരീക്ഷത്തില് പഠിക്കുന്ന ഗോത്രവിദ്യാര്ത്ഥികളെ മുന്നൊരുക്കമൊന്നുമില്ലാതെ കൊല്ലം നഗരത്തിലെ സ്കൂളിലേക്ക് മാറ്റുന്നത് ഇവരുടെ തുടര്പഠനംതന്നെ ഇല്ലാതാക്കുമെന്നാണ് ആക്ഷേപം. അതേസമയം ആദിവാസി വിദ്യാര്ത്ഥികളെ ജില്ലയ്ക്ക് പുറത്തേക്ക് കൊണ്ടുപോകണമെങ്കില് അനുവാദം വാങ്ങണമെന്ന് നേരത്തെ വയനാട് കലക്ടര് ഉത്തരവിട്ടിരുന്നു.
