മാന്നാര് : ബി.ജെ.പി ഭരിക്കുന്ന ചെന്നിത്തല – തൃപ്പെരുന്തുറ ഗ്രാമപഞ്ചായത്തില് പ്രസിഡന്റ് ബിന്ദു പ്രദീപിനെതിരെ സി.പി.എം കൊണ്ടുവന്ന അവിശ്വാസ പ്രമേയം പാസായി. മൂന്നു മുന്നണികള്ക്കും ആറുവീതം അംഗങ്ങളുള്ള 18അംഗ പഞ്ചായത്തില് ഇന്നലെ നടന്ന അവിശ്വാസ പ്രമേയത്തിന്മേലുള്ള ചര്ച്ചയില് മുഴുവന് അംഗങ്ങളും പങ്കെടുത്തെങ്കിലും ബി.ജെ.പി അംഗങ്ങള് വോട്ടെടുപ്പില് നിന്ന് വിട്ടുനിന്നു. കോണ്ഗ്രസ് പിന്തുണച്ചതോടെ 12 വോട്ടുകള്ക്കാണ് പ്രമേയം പാസായത്.
ഒട്ടേറെ രാഷ്ട്രീയനാടകങ്ങള്ക്ക് വേദിയായ ചെന്നിത്തല പഞ്ചായത്തില് പ്രസിഡന്റ് സ്ഥാനം പട്ടികജാതി വനിതാ സംവരണമാണ്. സി.പി.എമ്മിനും ബി.ജെ.പിക്കും മാത്രമേ ഈ വിഭാഗത്തില് നിന്ന് പ്രതിനിധികളുള്ളൂ. ആദ്യതവണ സി.പി.എമ്മിലെ വിജയമ്മ ഫിലേന്ദ്രന് കോണ്ഗ്രസ് പിന്തുണയോടെ പ്രസിഡന്റായി. എന്നാല് കോണ്ഗ്രസിന്റെ പിന്തുണ ആവശ്യമില്ലെന്ന് പാര്ട്ടി നേതൃത്വം കര്ശന നിലപാടെടുത്തതോടെ 38 ദിവസം കഴിഞ്ഞ് വിജയമ്മ രാജിവച്ചു. കോണ്ഗ്രസ് പിന്തുണയോടെ രണ്ടാമതും വിജയമ്മ പ്രസിഡന്റായെങ്കിലും സത്യപ്രതിജ്ഞ കഴിഞ്ഞയുടന് വീണ്ടും രാജിവച്ചു.
രണ്ട് തവണയും നിഷ്പക്ഷനിലപാട് സ്വീകരിച്ച് തിരഞ്ഞെടുപ്പില് നിന്ന് വിട്ടുനിന്ന കോണ്ഗ്രസ് വിമതന് ദീപു പടകത്തില് മൂന്നാമത് തിരഞ്ഞെടുപ്പില് ബി.ജെ.പിക്ക് വോട്ടു ചെയ്തു. സി.പി.എമ്മിന്റെ ഒരുവോട്ട് അസാധുവാകുകയും കോണ്ഗ്രസ് വിട്ടുനില്ക്കുകയും ചെയ്തതോടെയാണ് ബി.ജെ.പിക്ക് ഭരണം ലഭിച്ചത്. പിന്നീട് ദീപു പടകത്തില് കേരള കോണ്ഗ്രസ് മാണി വിഭാഗത്തില് ചേരുകയും എല്.ഡി.എഫിന്റെ ഭാഗമാവുകയും ചെയ്തതോടെ മൂന്ന് മുന്നണികളും 6 അംഗങ്ങള് വീതമുള്ള തുല്യശക്തികളായി മാറി.
