തൃശൂര്‍ : സ്‌കൂള്‍ പരിപാടിയില്‍ വെച്ച ഫ്ലക്സില്‍ തന്റെ ചെറിയ ഫോട്ടോ വെച്ചതിനെത്തുടര്‍ന്ന് ചടങ്ങ് ബഹിഷ്‌കരിച്ച സംഭവത്തില്‍ പ്രതികരണവുമായി തൃശൂര്‍ മേയര്‍ എം.കെ വര്ഗീസ്. താനല്ല, ആര് മേയറായാലും ഇങ്ങനെ കണ്ടാല്‍ വേദനിക്കുമെന്നും മേയര്‍ പദവിയെ ആര് താഴ്‌ത്തി കെട്ടാന്‍ ശ്രമിച്ചാലും അതിനെ ചോദ്യം ചെയ്യുമെന്നും അദ്ദേഹം പറഞ്ഞു. തുടരെ തുടരെയുണ്ടാകുന്ന വിവാദങ്ങളുമായി ബന്ധപ്പെട്ട ചോദ്യങ്ങള്‍ക്ക് ഒരു പ്രമുഖ മാധ്യമത്തോട് പ്രതികരിക്കുകയായിരുന്നു അദ്ദേഹം.
‘മേയറുടെ പടം ചെറുതായപ്പോള്‍ എം.കെ.വര്‍ഗീസിന് വേദനിച്ചില്ല. പക്ഷേ, മേയര്‍ക്ക് വേദനിച്ചു. കോര്‍പറേഷന്റെ കീഴിലുള്ള സര്‍ക്കാര്‍ സ്‌കൂളില്‍ മേയര്‍ മുഖ്യാതിഥിയും ഉദ്ഘാടകനും അധ്യക്ഷനും പുറത്ത് നിന്നുള്ളവരുമാകുമ്ബോള്‍ മേയര്‍ക്ക് വേദനിക്കും. ഏറ്റവും അവസാനം ചെറുതാക്കി മേയറുടെ ഫോട്ടോ കൊടുത്തിരിക്കുന്നു. എം.കെ.വര്‍ഗീസിന് ഇത് പ്രശ്‌നമല്ല. എന്നാല്‍, മേയര്‍ക്ക് പ്രശ്നമാണ്. മേയര്‍ പദവിയെ താഴ്‌ത്തിക്കെട്ടാന്‍ ആര് ശ്രമിച്ചാലും ഞാന്‍ ഈ കസേരയിലുള്ളിടത്തോളം കാലം അതിന് എതിര്‍ക്കും. ഞാനല്ല ആരു മേയറായാലും അപമാനിക്കാന്‍ പാടില്ല’- എം.കെ വര്ഗീസ് പറഞ്ഞു.
പോലീസ് സല്യൂട്ട് നല്‍കാത്തതിന്റെ പേരിലുണ്ടായ വിവാദത്തിലും അദ്ദേഹം പ്രതികരിച്ചു.’എനിക്ക് തന്ന പ്രോട്ടോക്കോള്‍ നിയമത്തില്‍ മേയറുടെ പദവി കാണിച്ചിരിക്കുന്നത് ഡെപ്യൂട്ടി സ്‌പീക്കറുടെ താഴെയാണ്. അത് എംപി‌യ്‌ക്കും എംഎല്‍എയ്‌ക്കും മുകളിലുമാണ്. ആ പദവിക്ക് സല്യൂട്ട് ഉണ്ടോ എന്ന സംശയമാണ് ഞാന്‍ ഡിജിപിയോട് ചോദിച്ചത്. എനിക്ക് സംശയം ചോദിക്കാന്‍ അധികാരമില്ലേ? ഞാന്‍ രേഖാമൂലം ചോദിച്ചതിന് ഒരു വര്‍ഷമായിട്ടും ഡിജിപി മറുപടി നല്‍കിയിട്ടില്ല. അവര്‍ പറയട്ടെ മേയറിന് സല്യൂട്ടില്ലെന്ന്. ആ സമയത്തുണ്ട്, ഈ സമയത്തില്ല എന്നൊന്നും പറഞ്ഞാല്‍ പോരാ. എം.കെ.വര്‍ഗീസിന് വേണ്ടി ചോദിച്ചതല്ല സല്യൂട്ട്. മേയര്‍മാര്‍ക്ക് വേണ്ടി ചോദിച്ചതാണ്’- അദ്ദേഹം പറഞ്ഞു.
