തിരുവനന്തപുരം : ജൂണ്‍ 9 അര്‍ധരാത്രി മുതല്‍ സംസ്ഥാനത്തു ട്രോളിങ് നിരോധനം നടപ്പിലാക്കും. ജൂലൈ 31 അര്‍ധരാത്രി വരെ 52 ദിവസത്തേക്കാണ് നിരോധനം. ഇക്കാലയളവില്‍ ട്രോളിങ് ബോട്ടിലെ തൊഴിലാളികള്‍ക്കും അനുബന്ധ തൊഴിലാളികള്‍ക്കും സൗജന്യ റേഷന്‍ അനുവദിക്കും. മത്സ്യമേഖലയിലെ ട്രേഡ് യൂണിയന്‍ നേതാക്കള്‍, വിവിധ വകുപ്പുകളിലെ ഉദ്യോഗസ്ഥര്‍ എന്നിവര്‍ മന്ത്രി സജി ചെറിയാന്റെ അധ്യക്ഷതയില്‍ ചേര്‍ന്ന യോഗത്തിലാണു തീരുമാനം.
നിരോധനകാലത്ത് ഇന്‍ബോര്‍ഡ് വള്ളങ്ങള്‍ ഒഴികെയുള്ള പരമ്പരാഗത മത്സ്യബന്ധന യാനങ്ങള്‍ക്കു കൊല്ലം നീണ്ടകര ഹാര്‍ബര്‍ ഈ വര്‍ഷവും തുറന്നുകൊടുക്കും. ഡീസല്‍ ബങ്കുകള്‍ തുറക്കാന്‍ അനുവദിക്കില്ലെങ്കിലും ഇന്‍ബോര്‍ഡ് വള്ളങ്ങള്‍ക്കു ഡീസല്‍ ലഭ്യമാക്കാന്‍ മത്സ്യഫെഡിന്റെ തിരഞ്ഞെടുത്ത ഡീസല്‍ ബങ്കുകള്‍ക്കു പ്രവര്‍ത്തിക്കാം. ഏകീകൃത കളര്‍ കോഡിങ് നടത്തിയിട്ടില്ലാത്ത ബോട്ടുകള്‍ ട്രോളിങ് നിരോധന കാലയളവില്‍ അതു പൂര്‍ത്തിയാക്കണം. നിരോധനം ലംഘിക്കുന്നവര്‍ക്കെതിരെ കര്‍ശന നടപടിയെടുക്കാനും യോഗം തീരുമാനിച്ചു.
