കോഴിക്കോട് : രാമനാട്ടുകരയില് ദമ്പതികള് മരിക്കാനിടയായ വാഹനാപകടത്തില് ട്രക്ക് ഡ്രൈവര് മദ്യലഹരിയിലായിരുന്നുവെന്ന് പോലീസ്. ട്രക്ക് ഡ്രൈവറായ മണ്ണാര്ക്കാട് സ്വദേശി ഹാരിഷിനെതിരെ മനപൂര്വമല്ലാത്ത നരഹത്യയ്ക്ക് പോലീസ് കേസെടുത്തു. കാര് യാത്രക്കാരായ മടവൂര് അരങ്കില് താഴം എതിരംമല കോളനിയിലെ കൃഷ്ണന്കുട്ടി (55), ഭാര്യ സുധ (45) എന്നിവരാണ് മരിച്ചത്. അപകടത്തില് ദമ്പതികളുടെ മകന് അരുണ് (21), സുഹൃത്ത് കണ്ണൂര് സ്വദേശി അലി, ഗുഡ്സ് ഓട്ടോയിലെ യാത്രക്കാരന് അന്വര് (44), സമീറ (38) എന്നിവര് ഗുരുതര പരിക്കുകളോടെ ആശുപത്രിയില് ചികിത്സയിലാണ്. വ്യാഴാഴ്ച വൈകുന്നേരമാണ് സംഭവം. ഇളയമകന് അഭിജിത്തിനെ എറണാകുളത്ത് പഠനസ്ഥലത്ത് എത്തിച്ച ശേഷം തിരിച്ചുവരുമ്പോഴാണ് അപകടമുണ്ടായത്. കോഴിക്കോട് ഭാഗത്ത് നിന്നും അമിതവേഗത്തില് തെറ്റായ വശത്ത് കൂടി വന്ന ലോറി കാറില് ഇടിക്കുകയായിരുന്നു.
