വാഷിംഗ്ടൺ: അമേരിക്കയും ഇറാനും തമ്മിലുള്ള സംഘർഷം വഷളാകുന്നതിനിടെ, അമേരിക്കൻ പ്രസിഡന്റ് ഡോണൾഡ് ട്രംപ് ഇറാന് നൽകിയ കർശന മുന്നറിയിപ്പ് ലോകത്തെ ആശങ്കയിലാക്കുന്നു. തന്നെ വധിക്കാൻ ഇറാൻ പദ്ധതിയിടുന്നതായുള്ള രഹസ്യാന്വേഷണ റിപ്പോർട്ടുകൾ പുറത്തുവന്നതിന് പിന്നാലെയാണ് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലിലൂടെ’ (Truth Social) രൂക്ഷമായ പ്രതികരണം നടത്തിയത്.
“ഇസ്ലാമിക് റിപ്പബ്ലിക് ഓഫ് ഇറാനെ ലക്ഷ്യം വെച്ച് 1,000 മിസൈലുകൾ ഇതിനകം പൂട്ടി സജ്ജമാക്കിയിട്ടുണ്ട് (Locked and Loaded); എനിക്കെതിരെ വധശ്രമം നടത്താൻ ഇറാൻ സർക്കാർ ശ്രമിച്ചാൽ ആയിരക്കണക്കിന് മിസൈലുകൾ കൂടി ഉടൻ തന്നെ പിന്തുടരും,” ട്രംപ് വ്യക്തമാക്കുന്നു.
ഇറാന്റെ ഏത് ഭാഗവും പൂർണ്ണമായും തകർക്കാനും നശിപ്പിക്കാനും അമേരിക്കൻ സൈന്യത്തിന് നിർദ്ദേശം നൽകിയിട്ടുണ്ടെന്നും, ഈ ഉത്തരവ് ഒരു വർഷത്തേക്ക് പ്രാബല്യത്തിലുണ്ടാകുമെന്നും അദ്ദേഹം കൂട്ടിച്ചേർത്തു.
ഇറാൻ പരമോന്നത നേതാവായിരുന്ന ആയത്തുള്ള അലി ഖമേനിയുടെ സംസ്കാരച്ചടങ്ങിനിടെ ചിലർ അമേരിക്കൻ പ്രസിഡന്റിനെ വധിക്കണമെന്ന് ആഹ്വാനം ചെയ്തതായുള്ള റിപ്പോർട്ടുകളാണ് ട്രംപിനെ പ്രകോപിപ്പിച്ചത്. കൂടാതെ, ഇറാൻ പുതിയൊരു വധശ്രമ പദ്ധതി തയ്യാറാക്കിയതായി ഇസ്രയേൽ രഹസ്യാന്വേഷണ ഏജൻസികൾ അമേരിക്കയ്ക്ക് വിവരം നൽകിയതായും റിപ്പോർട്ടുകളുണ്ട്.
കഴിഞ്ഞ ദിവസങ്ങളിൽ ഹോർമുസ് കടലിടുക്കിൽ വെച്ച് വ്യാപാര കപ്പലുകൾക്ക് നേരെ ഇറാൻ നടത്തിയ ആക്രമണവും, തുടർന്ന് അമേരിക്ക നടത്തിയ പ്രത്യാക്രമണങ്ങളും മേഖലയിലെ സമാധാന അന്തരീക്ഷം തകർത്തു.ഇരുരാജ്യങ്ങളും തമ്മിൽ കഴിഞ്ഞ മാസം ഒപ്പുവെച്ച വെടിനിർത്തൽ കരാർ ‘അവസാനിച്ചു’ എന്ന് ട്രംപ് പ്രഖ്യാപിച്ചെങ്കിലും, നയതന്ത്ര ചർച്ചകൾ തുടരാൻ ഇരുപക്ഷവും സമ്മതിച്ചിട്ടുണ്ട്. എന്നാൽ, ചർച്ചകൾക്ക് ഇടയിലും ഇറാനുമായുള്ള യുദ്ധം ഇനിയും അവസാനിച്ചിട്ടില്ലെന്നും ഇത് പുതിയൊരു ഘട്ടത്തിലേക്ക് കടക്കുകയാണെന്നുമാണ് വിദഗ്ധരുടെ വിലയിരുത്തൽ. ഹോർമുസ് കടലിടുക്കിലെ ഗതാഗത നിയന്ത്രണത്തെച്ചൊല്ലിയുള്ള തർക്കങ്ങളും ഉപരോധങ്ങളും മേഖലയിൽ യുദ്ധസമാനമായ അന്തരീക്ഷമാണ് നിലനിർത്തുന്നത്.
ഇറാൻ പുതിയ പരമോന്നത നേതാവായ മൊജ്തബ, തന്റെ പിതാവിന്റെ മരണത്തിന് പ്രതികാരം ചെയ്യുമെന്ന് പ്രഖ്യാപിച്ചതും സാഹചര്യം വഷളാക്കുന്നുണ്ട്. എങ്കിലും, ഖത്തർ ഉൾപ്പെടെയുള്ള മധ്യസ്ഥ രാജ്യങ്ങൾ സമാധാന ചർച്ചകൾ പുനരുജ്ജീവിപ്പിക്കാൻ ശ്രമങ്ങൾ നടത്തുന്നുണ്ട്. ആണവ പദ്ധതികളെക്കുറിച്ചുള്ള തർക്കങ്ങളും ആക്രമണങ്ങളും അവസാനിക്കാത്ത സാഹചര്യത്തിൽ, ട്രംപിന്റെ ഈ കടുത്ത മുന്നറിയിപ്പ് പശ്ചിമേഷ്യയിൽ വലിയൊരു സ്ഫോടനത്തിന് വഴിയൊരുക്കുമോ എന്ന ഭീതിയിലാണ് ലോകരാഷ്ട്രങ്ങൾ. സമാധാനത്തിന്റെ പാതയേക്കാൾ സൈനികമായ ശക്തമായ ഇടപെടലുകൾക്കാണ് ട്രംപ് മുൻതൂക്കം നൽകുന്നതെന്ന് വ്യക്തം.
