ദില്ലി: മോദി പരാമര്ശത്തിലെ മാനനഷ്ടക്കേസില് സ്ഥിരജാമ്യം ലഭിച്ച ശേഷം സത്യമാണ് തന്റെ ആയുധമെന്ന് കോണ്ഗ്രസ് നേതാവ് രാഹുല് ഗാന്ധിയുടെ ട്വീറ്റ്. മിത്രങ്ങളില് നിന്ന് ജനാധിപത്യത്തെ രക്ഷിക്കാനുള്ള പോരാട്ടമാണിതെന്നും രാഹുല് ട്വീറ്റ് ചെയ്തു. ‘മിത്രങ്ങളില് നിന്ന് ജനാധിപത്യത്തെ രക്ഷിക്കാനുള്ള പോരാട്ടമാണിത്. ഈ പോരാട്ടത്തില് സത്യമാണെന്റെ ആയുധം, സത്യമാണെന്റെ അഭയസ്ഥാനവും’. രാഹുല് ട്വീറ്റ് ചെയ്തു.
‘മോദി’ പരാമര്ശത്തിലെ മാനനഷ്ടക്കേസില് രാഹുലിനെ ശിക്ഷിച്ച സൂറത്ത് മജിസ്ട്രേറ്റ് കോടതി നേരത്തെ 30 ദിവസത്തേക്ക് ജാമ്യം അനുവദിച്ചിരുന്നു. അപ്പീല് നല്കാനായിരുന്നു മജിസ്ട്രേറ്റ് കോടതി 30 ദിവസം ജാമ്യം അനുവദിച്ചത്. ഇതിന് പിന്നാലെ ഇന്ന് രാഹുല് സെഷന്സ് കോടതിയില് അപ്പീല് നല്കിയതോടെയാണ് സ്ഥിര ജാമ്യം ലഭിച്ചത്. മെയ് മൂന്നിനാകും കേസ് വീണ്ടും പരിഗണിക്കുക. കര്ണാടകയിലെ കോലാറില് ലോക്സഭാ തെരഞ്ഞെടുപ്പ് റാലിയില് നടത്തിയ രാഹുലിന്റെ പ്രസംഗമാണ് ശിക്ഷയ്ക്കിടയാക്കിയത്.
