തൃശൂര് : സ്കൂള് ഓഫ് ഡ്രാമയിലെ വിദ്യാര്ഥിനിയെ ലൈംഗികമായി പീഡിപ്പിച്ചെന്ന പരാതിയില് അധ്യാപകനെതിരെ കേസെടുത്ത് പോലീസ്. സ്കൂള് ഓഫ് ഡ്രാമ ഡീന് എസ് സുനില്കുമാറിനെതിരെ വെസ്റ്റ് പോലീസ് ബലാല്സംഗ കുറ്റം ചുമത്തി എഫ്ഐആര് രജിസ്റ്റര് ചെയ്തിട്ടുണ്ട്. എന്നാല് അറസ്റ്റ് ഉള്പ്പടെയുള്ള നടപടികള് ഉണ്ടാകുന്നില്ലെന്നാണ് വിദ്യാര്ഥികളുടെ ആരോപണം. അധ്യാപകനെ പുറത്താക്കും വരെ പഠിപ്പ് മുടക്കുമെന്ന് വിദ്യാര്ഥികള് വ്യക്തമാക്കി.
സ്കൂള് ഓഫ് ഡ്രാമയിലെ ഡീന് എസ് സുനില് കുമാറിനെതിരെ ഗുരുതര ആരോപണങ്ങളാണ് പീഡനത്തിനിരയായ പെണ്കുട്ടി ഉന്നയിച്ചിരിക്കുന്നത്. ഒന്നാം വര്ഷ നാടക ബിരുദ വിദ്യാര്ഥിനിയെ സുനില് കുമാര് ഔദ്യോഗിക പദവി ദുരുപയോഗം ചെയ്ത് പീഡനത്തിനിരയാക്കി എന്നാണ് പരാതി. എന്നാല് അധ്യാപകനെ അറസ്റ്റ് ചെയ്യുകയോ കോളേജില് നിന്ന് പുറത്താക്കുകയോ ചെയ്തിട്ടില്ല. പരാതി നല്കാന് എത്തിയപ്പോള് വിദ്യാര്ഥിനിയോട് സ്റ്റേഷന് എസ് ഐ മോശമായി പെരുമാറിയെന്നും വിദ്യാര്ഥികള് ആരോപിക്കുന്നു.
ഓറിയന്റേഷന് ക്ലാസ്സിനിടെ താല്ക്കാലിക അധ്യാപകന് രാജ വാര്യര് പരാതിക്കാരിയായ കുട്ടിയെ ദേഹോപദ്രവം ഏല്പ്പിച്ചിരുന്നു. തുടര്ന്ന് സ്കൂള് ഓഫ് ഡ്രാമ ഗ്രീവന്സ് സെല്ലില് പെണ്കുട്ടി പരാതി നല്കി. പെണ്കുട്ടിക്ക് ധാര്മിക പിന്തുണയുമായി എത്തിയ സുനില്കുമാര് സൗഹൃദം മുതലെടുത്ത് പീഡനത്തിന് ഇരയാക്കുകയായിരുന്നുവെന്ന് പരാതിയില് പറയുന്നു. പെണ്കുട്ടി ആത്മഹത്യയ്ക്ക് ശ്രമിച്ചതോടെയാണ് പീഡന വിവരം പുറത്തുവന്നത്. ആരോപണവിധേയനായ എസ് സുനില്കുമാറിനെ അറസ്റ്റ് ചെയ്യുകയും സ്ഥാപനത്തില് നിന്ന് പുറത്താക്കുകയും ചെയ്യും വരെ പഠിപ്പുമുടക്കുമെന്ന് വിദ്യാര്ഥികള് പറഞ്ഞു.
