തിരുവനന്തപുരം: ഒക്ടോബര് നവംബര് മാസങ്ങളിലായി സംസ്ഥാനത്ത് നടക്കാനിരിക്കുന്ന തദ്ദേശ ഭരണ തെരഞ്ഞെടുപ്പില് സംവരണ സീറ്റുകളില് വ്യാപക മാറ്റം ഉണ്ടാകും. വനിതാ സംവരണ സീറ്റുകളില് പുരുഷ പ്രതിനിധികള് വരും. എസ്സി, എസ്ടി സീറ്റുകളും ഇത്തവണ മാറും. തിരുവനന്തപുരം കോര്പറേഷനില് ഇനി വരുന്നത് വനിതാ മേയറായിരിക്കും. കൊല്ലം കോഴിക്കോട് കോര്പറേഷനുകളുടെയും മേയര് കസേരയില് വനിതകള് വരും. സ്ത്രീകള് ഭരിക്കുന്ന കൊച്ചി കണ്ണൂര് തൃശൂര് കോര്പറേഷനുകളില് പുരുഷന്മാര് ഭരണ സാരഥ്യം ഏറ്റെടുക്കും.
തദ്ദേശ സ്ഥാപനങ്ങളില് നിലവില് 50 തമാനം വരുന്ന വനിതാ സംവരണ സീറ്റുകളിലെല്ലാം അഞ്ച് വര്ഷ കാലാവധി തീരുന്ന മുറക്ക് മാറ്റം വരും. മുന്സിപ്പാലിറ്റി ജില്ലാ ബ്ലോക്ക് പഞ്ചായത്ത് തലങ്ങളിലും സംവരണ സീറ്റുകള് അപ്പാടെ മാറും. ജനസഖ്യാ വര്ദ്ധനവിന് ആനുപാതികമായി തദ്ദേശഭരണ സ്ഥാപനങ്ങളിലെ അംഗങ്ങളുടെ എണ്ണം കൂട്ടാന് സര്ക്കാര് തീരുമാനം എടുത്തിട്ടുണ്ട്. കേരള പഞ്ചായത്ത് രാജ് ആക്ടും കേരള മുന്സിപ്പാലിറ്റി ആക്ടും ഭേദഗതി ചെയ്യുന്നതിനുള്ള ഓര്ഡിനന്സ് പക്ഷെ വൈകുകയാണ്. ഓര്ഡിനന്സ് ഇറങ്ങി തദ്ദേശഭരണ സ്ഥാപനങ്ങളുടെ അതിര്ത്തി പുനര്വിന്യസിച്ച് വേണം തെരഞ്ഞെടുപ്പ് നടത്താന്.
