റാന്നി: പൊതു ഇടങ്ങളും പൊതുസ്ഥാപനങ്ങളും മാലിന്യ മുക്തമാക്കുക എന്ന ലക്ഷ്യത്തോടെ പഴവങ്ങാടി ഗ്രാമ പഞ്ചായത്തിന്റെ നേതൃത്വത്തിൽ ‘ട്വിൻ ബിൻ’ സ്ഥാപിക്കുന്ന പദ്ധതിക്ക് തുടക്കമായി. പേപ്പർ, പ്ലാസ്റ്റിക് മാലിന്യങ്ങൾ പൊതുവഴികളിലും സ്ഥാപനങ്ങളിലും വലിച്ചെറിയുന്നത് തടയാനും അവ ഉറവിടത്തിൽ തന്നെ തരംതിരിച്ച് ശേഖരിക്കാനുമാണ് ഈ പദ്ധതി വിഭാവനം ചെയ്തിരിക്കുന്നത്. പദ്ധതിയുടെ ഭാഗമായി പഞ്ചായത്തിലെ പ്രധാന പൊതുവിടങ്ങൾ, വിദ്യാലയങ്ങൾ, സർക്കാർ ഓഫീസുകൾ എന്നിവിടങ്ങളിൽ രണ്ട് നിറങ്ങളിലുള്ള പ്രത്യേക ബിന്നുകൾ സ്ഥാപിച്ചു.
പഞ്ചായത്ത് ഹരിതകർമ്മ സേനയുടെ നേതൃത്വത്തിൽ ഈ ബിന്നുകളിൽ നിറയുന്ന മാലിന്യങ്ങൾ കൃത്യമായ ഇടവേളകളിൽ ശേഖരിക്കുകയും ശാസ്ത്രീയമായി സംസ്കരിക്കുകയും ചെയ്യും. പൊതുവിടങ്ങൾ വൃത്തിയായി സൂക്ഷിക്കുന്നതിനും പരിസ്ഥിതി സംരക്ഷണത്തിനുമായി നടപ്പിലാക്കുന്ന ഈ പദ്ധതിയുമായി മുഴുവൻ ജനങ്ങളും സഹകരിക്കണമെന്ന് പഞ്ചായത്ത് പ്രസിഡന്റ് പ്രമോദ് മന്ദമരുതി പറഞ്ഞു. പദ്ധതി ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഗ്രാമപഞ്ചായത്ത് വൈസ് പ്രസിഡന്റ് സൗമ്യ ജി.നായർ അധ്യക്ഷത വഹിച്ചു. സ്ഥിരം സമിതി അധ്യക്ഷ മോളി മാത്യു, ഗ്രാമപഞ്ചായത്ത് അംഗം മോനായി പുന്നൂസ്, ഷൈനി സൂസൻ എബ്രഹാം, അനി മാത്യു, സൗമ്യ വി.പി എന്നിവർ പ്രസംഗിച്ചു.
