പട്ന : വിവാഹ സൽക്കാരത്തിനിടെ അജ്ഞാതരുടെ വെടിയേറ്റ് സഹോദരന്മാർ മരിച്ചു. ബിഹാറിലെ പട്നയിലാണ് സംഭവം. മഞ്ജീത് കുമാർ (25), മനീഷ് കുമാർ (27) എന്നിവരാണ് കൊല്ലപ്പെട്ടത്. ഗോപാൽപൂർ പോലീസ് സ്റ്റേഷൻ പരിധിയിലുള്ള ഷാപൂർ ഗ്രാമത്തിലാണ് സംഭവം ഉണ്ടായത്. പ്രദേശവാസിയായ ദൗലത്ത് റായിയുടെ മകന്റെ വിവാഹ സൽക്കാരത്തിനിടെയാണ് ആക്രമണമുണ്ടായത്. മഞ്ജീതിനും മനീഷിനും നേരെ അജ്ഞാതർ വെടിയുതിർക്കുകയായിരുന്നു.
വിവരം അറിഞ്ഞ ഉടനെ പോലീസ് സ്ഥലത്തെത്തി ഇരുവരെയും അടുത്തുള്ള സർക്കാർ ആശുപത്രിയിലെത്തിച്ചു. എന്നാൽ ഇവരുടെ മരണം ഡോക്ടർമാർ സ്ഥിരീകരിച്ചു. സ്ഥലത്തുനിന്ന് മൂന്ന് വെടിയുണ്ടകൾ പോലീസ് കണ്ടെടുത്തു. പ്രതികളെ പിടികൂടാനുള്ള ശ്രമങ്ങൾ നടന്നുവരികയാണെന്ന പോലീസ് അറിയിച്ചു. മൃതദേഹങ്ങൾ പോസ്റ്റ്മോർട്ടത്തിന് അയച്ചിട്ടുണ്ടെന്ന് ഉദ്യോഗസ്ഥൻ പറഞ്ഞു. സ്വത്തു തർക്കത്തിന്റെ പേരിലാണ് ഇരുവരും കൊല്ലപ്പെട്ടതെന്നാണ് നിഗമനം.
