കാലടി : ശ്രീശങ്കരാചാര്യ സംസ്കൃത സർവകലാശാലയുടെ കാലടി മുഖ്യ കാമ്പസിലെ ചരിത്ര വിഭാഗവും കേരള കൗൺസിൽ ഫോർ ഹിസ്റ്റോറിക്കൽ റിസർച്ചും സംയുക്തമായി സംഘടിപ്പിക്കുന്ന ദ്വിദിന ദേശീയ ചരിത്ര സെമിനാർ ആരംഭിച്ചു. “Rethinking ‘Keralam’ : Landscapes and Social Configurations” എന്ന വിഷയത്തിൽ അക്കാദമിക് ബ്ലോക്കിലെ സെമിനാർ ഹാളിൽ സംഘടിപ്പിക്കുന്ന സെമിനാർ കേരളത്തിന്റെ ചരിത്രരചനയെ രൂപപ്പെടുത്തിയ ഉറവിടങ്ങൾ, ഗവേഷണ രീതികൾ, ആശയ ചട്ടക്കൂടുകൾ എന്നിവ പുന:പരിശോധിക്കുന്നതിലാണ് ശ്രദ്ധ കേന്ദ്രീകരിച്ചിരിക്കുന്നത്. ‘കേരളം’ എന്ന ആശയം എങ്ങനെ ചരിത്രപരമായി രൂപപ്പെടുകയും വിവിധ സാമൂഹിക, ഭൗമിക സാഹചര്യങ്ങളിൽ മാറിമറിഞ്ഞും ജീവിക്കപ്പെടുകയും ചെയ്തുവെന്നതിനെക്കുറിച്ചുള്ള വിശദമായ ചർച്ചകളാണ് സെമിനാറിൽ നടക്കുന്നത്. ചരിത്രകാരനും കേരള കൗൺസിൽ ഫോർ ഹിസ്റ്റോറിക്കൽ റിസർച്ചിന്റെ മുൻ അധ്യക്ഷനുമായ പ്രൊഫ. പി. കെ. മൈക്കിൾ തരകൻ സെമിനാർ ഉദ്ഘാടനം ചെയ്തു.
ചരിത്ര വിഭാഗം മേധാവി പ്രൊഫ. സൂസൻ തോമസ് അധ്യക്ഷയായിരുന്നു. കേരള കൗൺസിൽ ഫോർ ഹിസ്റ്റോറിക്കൽ റിസർച്ച് ഡയറക്ടർ ഡോ. ദിനേശൻ വി., വിജിഷ സി., റെജീഷ എം. എന്നിവർ പ്രസംഗിച്ചു. ഡോ. ജോൺ തോമസ്, ഡോ. റേച്ചൽ എ. വർഗീസ്, ഡോ. ജസ്റ്റിൻ മാത്യു, ഡോ. വി. ജെ. വർഗീസ് എന്നിവർ വിവിധ സെഷനുകളിൽ മുഖ്യ പ്രബന്ധങ്ങൾ അവതരിപ്പിച്ചു. ഇന്ന് (ജനുവരി 15) നടക്കുന്ന വിവിധ സെഷനുകൾക്ക് ഡോ. ദിനേശൻ വി., ഡോ. ജോൺ തോമസ്, ഡോ. ജസ്റ്റിൻ മാത്യു, ഡോ. വി. ജെ. വർഗീസ്, ഡോ. റേച്ചൽ എ. വർഗീസ് എന്നിവർ നേതൃത്വം നൽകും.
