കോന്നി : വകയാർ കോട്ടയം മുക്കിൽ കെ എസ് ആർ റ്റി സി ഫാസ്റ്റ് പാസഞ്ചർ ബസ് ഇടിച്ചു കയറി വാൻ ഡ്രൈവർക്കും വഴിയാത്രക്കാരിക്കും പരിക്കേറ്റു. മൂന്ന് ഇരുചക്ര വാഹനങ്ങളും തകർന്നു. വൈകിട്ട് നാല് മണിയോടെ ആയിരുന്നു സംഭവം. കെ എസ് ആർ റ്റി സി കണ്ണൂർ സൂപ്പർ ഫാസ്റ്റ് സ്വിഫ്റ്റ് ബസ് ആണ് നിയന്ത്രണം വിട്ട് ഇടിച്ചു കയറിയത്. വാൻ ഡ്രൈവർ കൊടുന്തറ സ്വദേശി ഇളവിനാൽ വീട്ടിൽ തോമസ് വി മാത്യു(54), ബസ് കാത്ത് നിന്നിരുന്ന കോന്നി എലിയറയ്ക്കൽ സ്വദേശി മുരളീസദനം ഷൈലജ പ്രഭ (52) എന്നിവർക്കാണ് പരിക്കേറ്റത്. ഇവരെ കോന്നിയിലെ സ്വകാര്യ ആശുപത്രിയിലേക്ക് മാറ്റി.
മരുന്നുകളുമായി വന്ന വാൻ നിർത്തിയിട്ടതിന് ശേഷം ഡ്രൈവറുടെ കൂടെ ഉണ്ടായിരുന്ന ആൾ സമീപത്തെ കടയിലേക്ക് പോയപ്പോൾ ആണ് അപകടം നടന്നത്. റോഡരികിൽ നിർത്തിയിട്ടിരുന്ന മൂന്ന് സ്കൂട്ടറുകളും അപകടത്തിൽ തകർന്നു. ബസ് കാത്തിരുപ്പ് കേന്ദ്രത്തിലേക്ക് ഇടിച്ചു കയറാതിരുന്നതിനാൽ വൻ ദുരന്തം ഒഴിവാകുകയായിരുന്നു. കോന്നി പോലീസ് സ്ഥലത്തെത്തി നടപടികൾ സ്വീകരിച്ചു.
