കോഴിക്കോട് : വെള്ളയില് റെയില് വേ സ്റ്റേഷനു സമീപത്ത് വെച്ച് മാവേലി എക്സ് പ്രസ്സിന് നേരെ പടക്കമെറിഞ്ഞ സംഭവത്തില് രണ്ടു കുട്ടികള് പിടിയില്. തങ്ങള് റോഡ് സ്വദേശികളായ പ്രായപൂര്ത്തിയാവാത്ത കുട്ടികളാണ് പിടിയിലായത്. ഓഗസ്റ്റ് 13 ന് രാത്രിയാണ് സംഭവം. മാവേലി എക്സ്പ്രസ്സിന് നേരെ എറിഞ്ഞ പടക്കം യാത്രക്കാരന്റെ കാലില് തട്ടി പുറത്തേക്ക് വീണ് പൊട്ടി. യാത്രക്കാരന് വാതിലിന് സമീപത്താണ് ഇരുന്നിരുന്നത്. കോഴിക്കോട് സ്റ്റേഷനില് ട്രെയിനില് എത്തിയപ്പോള് യാത്രക്കാരന് ആര് പി എഫിനെ കണ്ട് വിവരം പറഞ്ഞു. ഇതിന് പിന്നാലെ ആര് പി എഫ് ഈ മേഖലയില് വിശദമായ അന്വേഷണം നടത്തിയെങ്കിലും ആരെയും കണ്ടെത്താനായില്ല.
പ്രതികളെ കുറിച്ച് വിവരം ലഭിക്കുന്നതിനായി സ്ഥലത്ത് ഇന്നലെ വീണ്ടും പോലീസ് തിരച്ചില് നടത്തി. സിസിടിവി ദൃശ്യങ്ങളടക്കം ശേഖരിച്ച് പ്രതികളിലേക്ക് എത്താനാകുമോയെന്നായിരുന്നു പോലീസിന്റെ ശ്രമം. ഈ ഘട്ടത്തിലാണ് സംശയാസ്പദമായി മൂന്ന് കുട്ടികളെ കണ്ടത്. പോലീസിനെ കണ്ട കുട്ടികള് ഓടി രക്ഷപ്പെടാന് ശ്രമിച്ചു. മൂന്നംഗ സംഘത്തിലെ രണ്ട് പേരെ പോലീസ് കസ്റ്റഡിയിലെടുത്ത് റെയില്വെ സംരക്ഷണ സേനയ്ക്ക് കൈമാറി. കുട്ടികളുടെ കൈയ്യില് പടക്കം ഉണ്ടായിരുന്നുവെന്നാണ് പോലീസ് പറയുന്നത്. ട്രെയിനിന് നേരെ പടക്കം എറിയാനാണ് ഇന്നലെയും കുട്ടികള് ഇവിടെയെത്തിയത് എന്നാണ് പോലീസ് പറയുന്നത്. കുട്ടികളെ ആര് പി എഫ് ചൈല്ഡ് ലൈന് കെയര് സെന്ററിലെത്തിച്ചു. ഇവിടെ വെച്ച് കുട്ടികളുടെ മൊഴി രേഖപ്പെടുത്തിയ ശേഷം താക്കീത് നല്കി രണ്ട് പേരെയും രക്ഷിതാക്കള്ക്കൊപ്പം വിട്ടയച്ചു.