തിരുവല്ല : പുതിയതായി അനുവദിച്ച രണ്ട് അമൃത് ഭാരത് എക്സ്പ്രസ് ട്രെയിനുകൾക്ക് തിരുവല്ലയിൽ സ്റ്റോപ്പ് അനുവദിച്ചതായി ആന്റോ ആന്റണി എം. പി അറിയിച്ചു. നാഗർകോവിൽ-മംഗലാപുരം, തിരുവനന്തപുരം-ചാർലപ്പള്ളി (ഹൈദരാബാദ് ) എന്നീ അമൃത് ഭാരത് എക്സ്പ്രസ് ട്രെയിനുകൾക്കാണ് സ്റ്റോപ്പ് അനുവദിച്ചിട്ടുള്ളത്. ഈ ട്രെയിനുകളുടെ ഫ്ലാഗ് ഓഫ് ജനുവരി 23-ന് പ്രധാനമന്ത്രി നരേന്ദ്ര മോദി ഓൺലൈനായി നിർവ്വഹിക്കും.
തിരുവല്ലയിൽ എത്തിച്ചേരുന്ന ഈ ട്രെയിനുകൾക്ക് ജനപ്രതിനിധികളുടേയും റെയിൽവേ ഉദ്യോഗസ്ഥരുടേയും മറ്റും നേതൃത്വത്തിൽ വമ്പിച്ച സ്വീകരണം നൽകും. ആധുനിക സൗകര്യങ്ങളോടുകൂടിയ പുതിയ അമൃത് ഭാരത് എക്സ്പ്രസ് ട്രെയിനുകൾ പത്തനംതിട്ട ജില്ലയിലെയും സമീപ പ്രദേശങ്ങളിലെയും യാത്രക്കാർക്ക് ഏറെ ഉപകാരപ്പെടുന്നതാണെന്നും ദീർഘദൂര യാത്രകൾ കൂടുതൽ സൗകര്യപ്രദമാകുന്നതിനൊപ്പം മേഖലയിലെ വികസനത്തിനും സഹായകരമാകുമെന്നും എംപി പറഞ്ഞു.
