തൊടുപുഴ: നഗരത്തിന് നടുവില് ടയര് കടയ്ക്ക് തീ പിടിച്ചത് പരിഭ്രാന്തി പരത്തി, ലക്ഷങ്ങളുടെ നഷ്ടമെന്ന് പ്രാഥമിക നിഗമനം. മൂവാറ്റുപുഴ റോഡില് മുണ്ടമറ്റം പമ്പിന് എതിര്വശത്തായുള്ള ടയര് പ്ലാസ എന്ന വ്യാപാര സ്ഥാപനത്തിനാണ് ഇന്നലെ രാത്രി തീ പിടിച്ചത്. മേലുകാവ് സ്വദേശി ഷാജി പി.എസിന്റെ ഉടമസ്ഥതയിലുള്ളതാണ് സ്ഥാപനം. രാത്രിയില് സമീപത്തുകൂടി വാഹനത്തില് പോയവരാണ് കടയ്ക്കുള്ളില് നിന്ന് പുക വരുന്ന വിവരം തൊടുപുഴ അഗ്നിരക്ഷാ സേനയെ അറിയിച്ചത്.
ഇവരെത്തി ഷട്ടര് തകര്ത്തപ്പോഴേക്കും തീ ആളിപ്പടര്ന്നിരുന്നു. ഒരു മണിക്കൂറോളം പരിശ്രമിച്ചാണ് തീ നിയന്ത്രണ വിധേയമാക്കിയത്. സമീപത്തായി മറ്റു വ്യാപാര സ്ഥാപനങ്ങളും പെട്രോള് പമ്പും ഉള്ളതിനാല് വലിയ ആശങ്കയാണ് ഇത് പ്രദേശത്തുണ്ടാക്കിയത്. വലിയ തോതില് തീ ആളിപടരുകയും ടയര് കത്തി മണം വ്യാപകമായി പരക്കുകയും ചെയ്തു. ഷോട്ട് സര്ക്യൂട്ടാണ് തീ പിടുത്തത്തിന് കാരണമെന്നാണ് പ്രാഥമിക നിഗമനം. ഉടമ സ്ഥലത്തെത്താത്തിനാല് നാശ നഷ്ടത്തിന്റെ കണക്കും വ്യക്തമായിട്ടില്ല. കട ഭാഗീകമായി കത്തി നശിച്ചു. സമീപത്തെ മറ്റൊരു കടയിലേക്കും തീ പടര്ന്നിട്ടുണ്ട്.
