ദുബൈ: അറബിക്കടലില്‍ ഗുജറാത്ത് തീരത്ത് മുങ്ങുകയായിരുന്ന യുഎഇയിലെ കപ്പലിലെ ജീവനക്കാരെ ഇന്ത്യന്‍ കോസ്റ്റ് ഗാര്‍ഡ് നിന്ന് രക്ഷപ്പെടുത്തി. 22 ജീവനക്കാരെയാണ് രക്ഷപ്പെടുത്തിയത്. ഖോര്‍ഫഖാനില്‍ നിന്ന് കര്‍ണാടകയിലെ കാര്‍വാറിലേക്ക് പോവുകയായിരുന്ന ചരക്ക് കപ്പല്‍ എംടി ഗ്ലോബല്‍ കിംഗ് ആണ് അപകടത്തില്‍പ്പെട്ടത്. പോര്‍ബന്തര്‍ തീരത്ത് നിന്ന് 93 നോട്ടിക്കല്‍ മൈല്‍ അകലെയാണ് അപകടമുണ്ടായത്. കപ്പല്‍ വെള്ളത്തില്‍ മുങ്ങിയതിനാല്‍ ജീവനക്കാര്‍ അലാറം മണി മുഴക്കി. പിന്നീട് ഇന്ത്യന്‍ കോസ്റ്റ് ഗാര്‍ഡിന്‍റെ രണ്ട് ഹെലികോപ്റ്ററുകള്‍ രക്ഷാപ്രവര്‍ത്തനത്തിനായി സ്ഥലത്തെത്തി. 118 മീറ്റര്‍ നീളമുള്ള കപ്പലില്‍ 6,000 ടണ്‍ ബിറ്റുമെന്‍ ഉണ്ടായിരുന്നു. 20 ഇന്ത്യക്കാരും ഒരു പാകിസ്ഥാനിയും ഒരു ശ്രീലങ്കന്‍ പൗരനുമാണ് കപ്പലില്‍ ഉണ്ടായിരുന്നത്.
