ദുബൈ: യുഎഇയിലെ ഏറ്റവും സമ്പന്നനായ മലയാളി ലുലു ഗ്രൂപ്പ് ചെയർമാൻ എം.എ യൂസഫലി. 5.8 ബില്യൺ ഡോളറാണ് ആസ്തി. ഫോർബ്സ് മിഡിൽ ഈസ്റ്റ് പ്രസിദ്ധീകരിച്ച യുഎഇയിലെ സമ്പന്നരായ വിദേശികളുടെ പട്ടികയിലാണ് യൂസഫലി മുന്നിട്ടുനിൽക്കുന്നത്. പട്ടികയിൽ ആറാം സ്ഥാനത്താണ് അദ്ദേഹം. ലോകത്തിലെ ഏറ്റവും വലിയ ക്രിപ്റ്റോകറൻസി എക്സ്ചേഞ്ചായ ബിനാൻസ് സ്ഥാപകൻ ചാങ്പെങ് ഷാവോയാണ് പട്ടികയിൽ ഒന്നാമൻ. 110 ബില്യൺ ഡോളറാണ് ആസ്തി. ഗൗതം അദാനിയുടെ മൂത്ത സഹോദരൻ വിനോദ് അദാനിയാണ് (20.8 ബില്യൺ ഡോളർ) പട്ടികയിൽ രണ്ടാമത്. റഷ്യ (3), യുകെ (2), കാനഡ (2), എന്നീ രാജ്യങ്ങളിൽ നിന്നുള്ളവരും പട്ടികയിൽ മുന്നിലുണ്ട്.യൂസഫലിയടക്കം പട്ടികയിൽ ഒമ്പത് ഇന്ത്യക്കാരാണുള്ളത്.
ലാൻഡ്മാർക്ക് ഗ്രൂപ്പ് ചെയർവുമൺ രേണുക ജഗതിയാനി (5.6 ബില്യൺ ഡോളർ), ആർപി ഗ്രൂപ്പ് സ്ഥാപകൻ രവി പിള്ള (4.2 ബില്യൺ ഡോളർ), ജെംസ് എഡ്യൂക്കേഷൻ മേധാവി സണ്ണി വർക്കി (4 ബില്യൺ ഡോളർ), ശോഭ ഗ്രൂപ്പ് സ്ഥാപകൻ പിഎൻസി മേനോൻ (3.9 ബില്യൺ ഡോളർ ), ബുർജീൽ ഹോൾഡിങ്സ് ചെയർമാൻ ഷംഷീർ വയലിൽ (1.8 ബില്യൺ ഡോളർ), ഫൈവ് ഹോൾഡിങ്സ് ചെയർമാൻ കബീർ മുൽചന്ദാനി എന്നിവരാണ് പട്ടികയിൽ ഇടം പിടിച്ച മറ്റ് ഇന്ത്യക്കാർ. പട്ടികയിൽ ഏറ്റവും കൂടുതൽ സമ്പന്നരുള്ളത് ഇന്ത്യയിൽ നിന്നാണ്. 49.9 ബില്യൺ ഡോളറാണ് പട്ടികയിലുള്ള ഇന്ത്യൻ സമ്പന്നരുടെ ആകെ ആസ്തി.
