പത്തനംതിട്ട : കേന്ദ്ര സർക്കാരിന്റെ പിഎം ശ്രീ പദ്ധതി നടപ്പിലാക്കുന്നതിൽ നിന്നും യു.ഡി.എഫ്. സർക്കാർ അടിയന്തിരമായി പിന്മാറണമെന്നും മതേതരത്വം സംരക്ഷിക്കണമെന്നും ആവശ്യപ്പെട്ട് ഒക്ടോബർ ഒന്ന് വ്യാഴാഴ്ച എസ്.ഡി.പി.ഐ. പത്തനംതിട്ട ജില്ലാ കമ്മറ്റിയുടെ നേതൃത്വത്തില് പത്തനംതിട്ട കളക്ടറേറ്റിലേക്ക് മാർച്ച് നടത്തും. രാവിലെ 10.30 ന് ടൗൺ സ്ക്വയറിൽ നിന്നും ആരംഭിക്കുന്ന മാര്ച്ച് എസ്.ഡി.പി.ഐ. സംസ്ഥാന ജനറൽ സെക്രട്ടറി കെ.കെ.അബ്ദുൽ ജബ്ബാർ ഉദ്ഘാടനം ചെയ്യും. ജില്ലാ പ്രസിഡന്റ് എസ്.മുഹമ്മദ് അനീഷ് അധ്യക്ഷത വഹിക്കും.
കേന്ദ്ര ഭരണകൂടം വിദ്യാഭ്യാസ മേഖലയെ കാവിവത്ക്കരിക്കുവാന് ലക്ഷ്യമിട്ട് നടപ്പിലാക്കുന്ന പദ്ധതികൾക്ക് സംസ്ഥാന സർക്കാർ കൂട്ടുനിൽക്കുകയാണെന്ന് എസ്.ഡി.പി.ഐ. ആരോപിച്ചു. കേരളത്തിന്റെ മതേതര വിദ്യാഭ്യാസ പാരമ്പര്യത്തെ തകർക്കുന്ന ഇത്തരം നീക്കങ്ങൾക്കെതിരെ ശക്തമായ ജനകീയ പ്രതിരോധം തീർക്കുന്നതിന്റെ ഭാഗമായാണ് പ്രതിഷേധ മാർച്ച് നടത്തുന്നത്. എസ്.ഡി.പി.ഐ. ജില്ല – മണ്ഡലം നേതാക്കൾ ഉൾപ്പെടെയുള്ളവര് മാർച്ചിൽ പങ്കെടുക്കുമെന്നും ഭാരവാഹികള് അറിയിച്ചു.
