പത്തനംതിട്ട : ഡിസംബര് 9-ാം തീയതി നടക്കുന്ന തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പില് ജില്ലാ, ബ്ലോക്ക്, ഗ്രാമപഞ്ചായത്ത്, മുന്സിപ്പാലിറ്റി എന്നിവയില് യു.ഡി.എഫ് തിളക്കമാര്ന്ന വിജയം കരസ്ഥമാക്കുമെന്ന് ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് പ്രസ്താവിച്ചു. ജില്ലയില് യു.ഡി.എഫ് ഒരുകാലത്തും ഉണ്ടാകാത്തവിധം ഐക്യത്തോടുകൂടിയാണ് തെരഞ്ഞെടുപ്പിനെ നേരിടുന്നതെന്നും ജില്ലയിലെ ബഹുഭൂരിപക്ഷം ഗ്രാമപഞ്ചായത്ത് വാര്ഡുകളും മുന്സിപ്പാലിറ്റി വാര്ഡുകളും ബ്ലോക്ക് പഞ്ചായത്തും ജില്ലാ പഞ്ചായത്തും തിരിച്ചു പിടിക്കുമെന്നും അദ്ദേഹം പറഞ്ഞു.
പിണറായി സര്ക്കാരിന്റെ അഴിമതി, കെടുകാര്യസ്ഥത, തദ്ദേശ സ്വയംഭരണ സ്ഥാപനങ്ങളുടെ അധികാരവും ഫണ്ടും കവര്ന്നെടുത്ത് തദ്ദേശ സ്വയംഭരണ സ്ഥാപനങ്ങളുടെ കഴുത്തു ഞെരിച്ചതും ശബരിമലയിലെ സി.പി.എം നേതാക്കളുടെ സ്വര്ണ്ണക്കൊള്ളയ്ക്കും എതിരെ ജനങ്ങള് ഈ തിരഞ്ഞെടുപ്പില് യു.ഡി.എഫിന് അനുകൂലമായി വോട്ട് ചെയ്യുമെന്നും അദ്ദേഹം പറഞ്ഞു. എല്.ഡി.എഫിന്റെ തെരഞ്ഞെടുപ്പ് പ്രകടനപത്രിക തട്ടിപ്പാണെന്നും കഴിഞ്ഞ അഞ്ചുവര്ഷം ജില്ലാ പഞ്ചായത്തില് യാതൊരു വികസനവും നടത്തിയിട്ടില്ലെന്നും പദ്ധതികളുടെ വിനിയോഗത്തില് ജില്ല പിന്നിലായത് ഈ തെരഞ്ഞെടുപ്പില് പ്രതിഫലിക്കുമെന്നും ഡി.സി.സി പ്രസിഡന്റ് പറഞ്ഞു.
