കാസര്ഗോഡ് : എന്ഡോസള്ഫാന് ഇരകള്ക്കെതിരായ വിവാദ പരാമര്ശത്തില് ഉദുമ എംഎല്എ സി എച്ച് കുഞ്ഞമ്പുവിനെതിരെ പ്രതിഷേധം ശക്തം. ഉദുമ എംഎല്എ കാസര്ഗോട്ടെ എന്ഡോസള്ഫാന് ഇരകളെ അധിക്ഷേപിച്ചുകൊണ്ട് പരാമര്ശം നടത്തിയിരുന്നു. ചിലര്ക്ക് എത്ര കിട്ടിയാലും മതിയാകില്ല എന്നായിരുന്നു എംഎല്എയുടെ പരാമര്ശം. സി എച്ച് കുഞ്ഞമ്പുവിന്റെ വാക്കുകള് വേദനിപ്പിച്ചെന്ന് ഇരയായ കുട്ടിയുടെ മാതാവ് അരുണി പ്രതികരിച്ചു.
എംഎല്എയുടെ പരാമര്ശം വേദനാജനകമാണ്. തന്റെ മകന് സന്തോഷം എന്തെന്ന് അറിയുക പോലുമില്ല. മകന് ഇരിക്കാനോ നടക്കാനോ പോലും കഴിയില്ല. തങ്ങള്ക്ക് നല്കുന്ന സഹായങ്ങള് ഔദാര്യമായി കാണരുത്. കാസര്ഗോട്ട് നല്ല ആശുപത്രി അത്യാവശ്യമാണ്. എന്ഡോസള്ഫാന് ഇരകള്ക്ക് മാത്രമല്ല, ചികിത്സാ സൗകര്യം എല്ലാവരുടെയും ആവശ്യമാണ്. തങ്ങള്ക്ക് മാനുഷിക പരിഗണന നല്കണമെന്നും അരുണി പ്രതികരിച്ചു.
