കൊച്ചി: കുടുംബക്കല്ലറയിലെത്തി പ്രാര്ത്ഥന നടത്തി ഉമാ തോമസ് പ്രചരണത്തിലേയ്ക്ക്. ഇടുക്കി ഉപ്പുതോട്ടിലെ സെന്റ് ജോസഫ്സ് പള്ളി സെമിത്തേരിയിലെ കുടുംബക്കല്ലറയില് ശാന്തമായി ഉറങ്ങുന്ന പി ടിയുടെ കല്ലറയ്ക്കു മുന്നില് മൗനമായി പ്രാര്ത്ഥിച്ച് അനുഗ്രഹം വാങ്ങിയാണ് തുടക്കം കുറിച്ചത്. ആത്മവിശ്വാസം തന്നെയാകും ഉമ തോമസിന് തൃക്കാക്കരയിലെ പോരാട്ടത്തിന്റെ കൈമുതല്. സ്ഥാനാര്ത്ഥി പ്രഖ്യാപനം വന്നതിന് പിന്നാലെ ഇന്നലെ രാത്രി തന്നെ ഉമ മക്കള്ക്കൊപ്പം പിടിയുടെ ജന്മനാടായ ഉപ്പുതോട്ടിലേക്ക് പോയിരുന്നു.
ബന്ധുക്കള്ക്കൊപ്പം ഇന്ന് പുലര്ച്ചെ ഉപ്പുതോട് സെന്റ് ജോസഫ്സ് പള്ളിയില് എത്തി. അമ്മയ്ക്കൊപ്പം പിടിയുടെ ചിതാഭസ്മം അടക്കം ചെയ്ത പുതിയാപറമ്പില് കുടുംബക്കല്ലറയ്ക്ക് മുന്നില് ഉമയുടെ പ്രാര്ത്ഥന. തുടര്ന്ന് പള്ളിയിലേക്ക്. പള്ളിയില് കുര്ബാനയില് പങ്കുകൊണ്ടു. തുടര്ന്ന് വീണ്ടും പിടിയുടെ കല്ലറയില് എത്തി പ്രാര്ത്ഥന. ഒപ്പീസ് അടക്കമുള്ള പ്രാര്ത്ഥന കഴിഞ്ഞാണ് ഉമ പളളിയില് നിന്നും മടങ്ങിയത്.
നേരത്തെ പള്ളിയിലെത്തിയപ്പോഴും മാധ്യമങ്ങള്ക്ക് ഉമയോട് ചോദിക്കാനുണ്ടായിരുന്നത് കെ വി തോമസ് അടക്കമുള്ളവര് നടത്തുന്ന വെല്ലുവിളിയെക്കുറിച്ച് തന്നെ. ആരെയും നോവിക്കാതെ ഉമയുടെ തന്ത്രപരമായ മറുപടിയും മാധ്യമങ്ങള്ക്ക് കിട്ടി. ഇന്നു മുതല് പ്രചാരണ രംഗത്ത് സജീവമാകാനാണ് യു ഡി എഫ് തീരുമാനിച്ചിരിക്കുന്നത്. മണ്ഡലം യു ഡി എഫ് കണ്വന്ഷനും ഇന്നു നടക്കും.