കോഴിക്കോട്: ഏക സിവില്കോഡ് വിഷയത്തില് സിപിഎമ്മിനെതിരെ വെല്ഫെയര് പാര്ട്ടി സംസ്ഥാന പ്രസിഡന്റ് റസാഖ് പാലേരി. സംഘപരിവാറിന്റെ കെണികള് തിരിച്ചറിഞ്ഞ് കൂടുതല് ജാഗ്രത്തായ നീക്കങ്ങള് വിവിധ കോണുകളില്നിന്ന് ശക്തിപ്പെടുമ്പോള് താത്കാലിക തെരഞ്ഞെടുപ്പ് നേട്ടങ്ങള്ക്കായി അവര്ക്ക് ചൂട്ടുപിടിച്ചുകൊടുക്കുന്ന നീക്കങ്ങളില്നിന്ന് സി.പി.എം പിന്മാറണമെന്ന് റസാഖ് പാലേരി പറഞ്ഞു.
ബി.ജെ.പി നടപ്പാക്കാനുദ്ദേശിക്കുന്ന വംശീയ പദ്ധതികളില് ഏറ്റവും പുതിയ ഇനമാണ് ഏക സിവില്കോഡ്. വൈവിധ്യങ്ങളെയും വിവിധ മത – സമുദായ – ഗോത്ര വിഭാഗങ്ങളുടെ സ്വതന്ത്ര അസ്തിത്വങ്ങളെയും നിഷ്കാസനം ചെയ്യല് അവരുടെ സവര്ണ വംശീയ അജണ്ടകളില് പെട്ടതാണ്. 2024ലെ പൊതുതെരഞ്ഞെടുപ്പ് മുന്നില് കണ്ടാണ് ഇപ്പോള് വീണ്ടും ബി.ജെ.പി ഏക സിവില്കോഡിനെ ചര്ച്ചകളിലേക്ക് കൊണ്ടുവരുന്നത്. രാജ്യത്തെ മുസ്ലിം സമൂഹത്തെ മറുവശത്ത് പ്രതിഷ്ഠിച്ചുകൊണ്ടാണ് ബി.ജെ.പി ഇക്കാലമത്രയും തെരഞ്ഞെടുപ്പുകളെ നേരിട്ടത്. ഏക സിവില്കോഡിനെ മുസ്ലിം സമൂഹവുമായി മാത്രം ബന്ധപ്പെട്ട പ്രശ്നമാക്കി പരിമിതപ്പെടുത്തുക എന്നത് സംഘ്പരിവാറിന്റെ രാഷ്ട്രീയാവശ്യമാണെന്നും അദ്ദേഹം പറഞ്ഞു. ഇപ്പോള് സി.പി.എം ഏക സിവില് കോഡിനെതിരെ ശബ്ദമുയര്ത്തുന്നത് സ്വാഗതാര്ഹമാണ്. എന്നാല് അപ്പോഴും ബി.ജെ.പി ഉയര്ത്തുന്ന അതേ ധ്രുവീകരണ ഭാഷയാണ് പ്രതിരോധിക്കാനാണെന്ന ഭാവത്തില് സി.പി.എമ്മും ഉപയോഗിക്കുന്നതെന്നും അദ്ദേഹം കുറ്റപ്പെടുത്തി.