ന്യൂഡല്ഹി : അതിര്ത്തിയില് തുടരുന്ന കര്ഷകരോട് പ്രക്ഷോഭം അവസാനിപ്പിക്കണമെന്ന് ആവശ്യപ്പെട്ട് കേന്ദ്ര കൃഷി മന്ത്രി നരേന്ദ്ര സിങ് തോമര്. വിവാദമായ മൂന്ന് കാര്ഷിക നിയമങ്ങള് റദ്ദാക്കുന്നതിനുള്ള ബില് പാര്ലമെന്റില് അവതരിപ്പിക്കുന്നതിന് മുന്നോടിയായാണ് കൃഷിമന്ത്രിയുടെ അഭ്യര്ഥന.‘മൂന്ന് കാര്ഷിക നിയമങ്ങള് പിന്വലിക്കുമെന്ന് പ്രഖ്യാപിച്ചതിന് ശേഷവും കര്ഷകര് സമരം തുടരുന്നതില് അര്ഥമില്ല. കര്ഷകരോട് സമരം അവസാനിപ്പിച്ച് വീട്ടിലേക്ക് മടങ്ങാന് അഭ്യര്ഥിക്കുന്നു’ -തോമര് പറഞ്ഞു.
കാര്ഷിക നിയമങ്ങള് റദ്ദാക്കുന്നതിനുള്ള ബില് തിങ്കളാഴ്ച അവതരിപ്പിക്കും. അന്നേദിവസം പാര്ലമെന്റില് ഹാജരാകാന് ലോക്സഭ എം.പിമാര്ക്ക് ബി.ജെ.പി വിപ്പ് നല്കുകയും ചെയ്തു. കര്ഷകര് ഉന്നയിക്കുന്ന പ്രശ്നങ്ങള് ചര്ച്ചചെയ്യാന് ഒരു കമ്മിറ്റി രൂപീകരിക്കുമെന്നും കൃഷി മന്ത്രി പറഞ്ഞു
അതെ സമയം പ്രധാനമന്ത്രിയുടെ പ്രഖ്യാപനത്തെ കര്ഷകര് സ്വാഗതം ചെയ്തെങ്കിലും കാര്ഷിക നിയമങ്ങള് ഔദ്യോഗികമായി പിന്വലിക്കാതെയും കര്ഷകരുടെ ആവശ്യങ്ങള് അംഗീകരിക്കുന്നതുവരെയും പ്രക്ഷോഭം തുടരുമെന്ന് കര്ഷക സംഘടനകള് അറിയിക്കുകയായിരുന്നു. കര്ഷകരുടെ നേതൃത്വത്തില് തിങ്കളാഴ്ച പാര്ലമെന്റിലേക്ക് ട്രാക്ടര് റാലി സംഘടിപ്പിക്കും. 60 ട്രാക്ടറുകള് റാലിയില് അണിനിരത്തുമെന്നും 1000 പേരെ പങ്കെടുപ്പിക്കുമെന്നും കര്ഷക നേതാവ് രാകേഷ് ടികായത്ത് അറിയിച്ചിരുന്നു.
