ബീജിങ്: റോബോട്ടിക്സിൽ പുതിയ ചരിത്രം കുറിച്ച് ചൈന. ദുഷ്കരമായ പാറക്കെട്ടുകളും ചെളിപ്പാതകളും കുത്തനെയുള്ള ചരിവുകളും അനായാസം മറികടക്കാൻ കഴിയുന്ന അത്യാധുനിക നാല് കാലുകളുള്ള AS2-W റോബോട്ടിനെ അവതരിപ്പിച്ച് ചൈനീസ് കമ്പനി യൂണിട്രീ വീണ്ടും ലോകശ്രദ്ധ പിടിച്ചുപറ്റുകയാണ്. എഐ സാങ്കേതികവിദ്യയും ഹൈബ്രിഡ് ചലന സംവിധാനവും ഒരുമിക്കുന്ന ഈ റോബോട്ട് ഭാവിയിലെ ലോജിസ്റ്റിക്സ്, രക്ഷാപ്രവർത്തനം, വ്യാവസായിക പരിശോധന തുടങ്ങിയ മേഖലകളിൽ വലിയ മാറ്റങ്ങൾ സൃഷ്ടിക്കുമെന്നാണ് വിലയിരുത്തൽ.
എക്സിൽ പങ്കുവച്ച വീഡിയോയിലൂടെയാണ് AS2-Wയുടെ പ്രകടനം യൂണിട്രീ പുറത്തുവിട്ടത്. കുത്തനെയുള്ള പാറക്കെട്ടുകൾ കയറുന്നതും, ചെറുതോടുകൾ മുറിച്ചുകടക്കുന്നതും, അതിവേഗത്തിൽ ദിശമാറ്റുന്നതും, ഫ്ലിപ്പ് ചെയ്യുന്നതുമടക്കമുള്ള ദൃശ്യങ്ങൾ ഇതിനോടകം ശ്രദ്ധ നേടിയിട്ടുണ്ട്. പുറത്ത് ബാക്ക്പാക്ക് വഹിച്ചുകൊണ്ടാണ് റോബോട്ട് ഈ പരീക്ഷണങ്ങൾ പൂർത്തിയാക്കുന്നത്. റീഇൻഫോഴ്സ്മെന്റ് ലേണിങ് സാങ്കേതികവിദ്യയുടെ സഹായത്തോടെ വിവിധ സാഹചര്യങ്ങളോട് തത്സമയം പൊരുത്തപ്പെടാൻ കഴിയുന്നതാണ് ഇതിന്റെ പ്രധാന സവിശേഷതയെന്ന് കമ്പനി പറയുന്നു.
മുമ്പ് യൂണിട്രീ പുറത്തിറക്കിയ റോബോട്ടിക് നായകളിൽ നിന്ന് വ്യത്യസ്തമായി, കാലുകൾക്കും ചക്രങ്ങൾക്കും ഒരുപോലെ പ്രാധാന്യം നൽകുന്ന ഹൈബ്രിഡ് ഡിസൈനാണ് AS2-W സ്വീകരിച്ചിരിക്കുന്നത്. സമതലങ്ങളിൽ ചക്രങ്ങളുടെ സഹായത്തോടെ അതിവേഗത്തിൽ സഞ്ചരിക്കാനും, കല്ലും പാറയും ചരിവുകളും നിറഞ്ഞ പ്രദേശങ്ങളിൽ കാലുകളുടെ സഹായത്തോടെ മുന്നേറാനും ഇതിന് കഴിയും.
16 കിലോഗ്രാം വരെ തുടർച്ചയായി ഭാരം വഹിക്കാൻ കഴിയുന്ന AS2-Wയുടെ ആകെ ഭാരം ബാറ്ററിയുൾപ്പെടെ ഏകദേശം 18 കിലോഗ്രാമാണ്. ഒറ്റ ചാർജിൽ 30 കിലോമീറ്ററിലധികം സഞ്ചരിക്കാനും സെക്കൻഡിൽ അഞ്ച് മീറ്ററിലധികം വേഗത കൈവരിക്കാനും കഴിയുമെന്ന് യൂണിട്രീ അവകാശപ്പെടുന്നു. 25 സെന്റീമീറ്റർ ഉയരമുള്ള പടികൾ കയറാനും, 40 ഡിഗ്രി ചരിവുകൾ മറികടക്കാനും, അര മീറ്റർ ഉയരമുള്ള തടസ്സങ്ങൾ കടന്നുപോകാനും ഇതിന് സാധിക്കും. 12 ഹൈ-പവർ ഡെൻസിറ്റി മോട്ടോറുകൾ, എട്ട് കോർ പ്രോസസർ, വൈ-ഫൈ 6, ബ്ലൂടൂത്ത് 5.2 എന്നിവയാണ് പ്രധാന സാങ്കേതിക സവിശേഷതകൾ.
