കുറ്റ്യാടി: അജ്ഞാത ജീവിയുടെ ആക്രമണത്തില്‍ നടുങ്ങി പ്രദേശവാസികള്‍. തീക്കുനി തൂവ്വമല ഭാഗത്ത് വിവിധയിടങ്ങളിലാണ് അജ്ഞാത ജീവിയെ കണ്ടെത്തിയത്. ഇതോടെ നാട്ടുകാര്‍ ആശങ്കയില്‍ കഴിയുകയാണ്. തീക്കുനി പ്രദേശത്തെ മൂന്നിടത്താണ് അജ്ഞാത ജീവിയെ കണ്ടത്. കഴിഞ്ഞ ഞായറാഴ്ച രാത്രിയും ചൊവ്വാഴ്ച രാത്രിയുമാണ് ഈ മേഖലയില്‍ അജ്ഞാത ജീവിയുടെ സാന്നിധ്യം തിരിച്ചറിഞ്ഞത്. സംഭവത്തെ തുടര്‍ന്ന് കുറ്റ്യാടി പോലീസും ഫോറസ്റ്റ് അധികൃതരും സ്ഥലത്തെത്തി പരിശോധന നടത്തി.
ഞായറാഴ്ച രാത്രി ഒമ്പത് മണിയോടെയാണ് ജീവിയെ ആദ്യം കണ്ടത്. നായയുടെ പിന്നാലെ വലിയൊരു ജീവി ഓടുന്നതാണ് കണ്ടത്. നാട്ടുകാര്‍ നടത്തിയ തിരച്ചിലില്‍ വിവിധയിടങ്ങളില്‍ കാല്‍പാടുകള്‍ കണ്ടു. പോലീസിന്റെയും ഫോറസ്റ്റ് അധികൃതരുടെയും പരിശോധനയില്‍ പുലിയുടേതിനേക്കാള്‍ ചെറുതാണ് കാല്‍പ്പാടുകളെന്നും കുറുനരി പോലുള്ള ഏതെങ്കിലും ജീവിയാകാനാണ് സാധ്യതയെന്നും പറഞ്ഞു. എന്നാല്‍ അജ്ഞാത ജീവി ഏതാണെന്ന് മനസിലാകാതെ പേടിച്ചിരിക്കുകയാണ് വീട്ടുകാരും പരിസരവാസികളും.
