റാന്നി: ഉന്നത്താനിയില് കടുവയെ കണ്ടെന്ന വാര്ത്ത പരന്നതിന് പിന്നാലെ കുടമുരുട്ടി- കൊച്ചുകുളം റോഡിന്റെ വശങ്ങളിലേക്ക് പടര്ന്നു കിടന്ന കാട് വി.എസ്.എസ് പ്രവര്ത്തകരുടെ നേതൃത്വത്തില് വെട്ടിമാറ്റി. നന്നേ വീതി കുറഞ്ഞ റോഡിന്റെ വശങ്ങളിലേക്ക് സംരക്ഷിത വനമേഖലയില് നിന്നുള്ള മരങ്ങള് ഉള്പ്പടെ ചാഞ്ഞു നില്ക്കുന്ന അവസ്ഥയിലായിരുന്നു. വളവുകളുള്ള ഭാഗങ്ങളില് റോഡിന്റെ വശങ്ങളിലെ കാട് യാത്രക്കാര്ക്ക് ഏറെ ബുദ്ധിമുട്ട് ഉണ്ടാക്കിയിരുന്നു.
രാത്രിയിലും പകലും കാട്ടുപന്നികളും, കേഴയും ഉള്പ്പടെയുള്ള ജീവികള് റോഡിലേക്ക് എടുത്തു ചാടുന്നത് പതിവാണ്. കൂടാതെ കാടു മൂടി കിടക്കുന്ന ഭാഗത്തേക്ക് മാലിന്യങ്ങള് നിക്ഷേപിക്കുന്നതും വര്ധിച്ചിരുന്നു. കരിക്കുളം ഫോറെസ്റ്റ് സ്റ്റേഷന്റെ പരിധിയില് ഉള്ള കുടമുരുട്ടി വി.എസ്.എസ് പ്രവര്ത്തകരാണ് കഴിഞ്ഞ ദിവസം റോഡിന്റെ വശങ്ങള് വൃത്തയാക്കിയത്.
