ലക്നൗ : പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത് ദിവസങ്ങള്ക്കകം യു പിയിലെ ബുന്ദേല്ഖണ്ഡ് എക്സ് പ്രസ് വേയില് അറ്റകുറ്റപ്പണി നടത്തുന്ന വീഡിയോ വൈറലായി. 296 കിലോമീറ്റര് ദൈര്ഘ്യമുള്ള റോഡിന്റെ ആയുസ് ദിവസങ്ങള് മാത്രം എന്ന രീതിയിലാണ് വീഡിയോ പ്രചരിക്കുന്നത്. ബി.ജെ.പി എം.പി വരുണ് ഗാന്ധിയും സമാജ്വാദി പാര്ട്ടി നേതാവ് അഖിലേഷ് യാദവും വീഡിയോ ട്വീറ്റ് ചെയ്തിട്ടുമുണ്ട്.
മഴയിലാണ് റോഡ് തകര്ന്നതെന്നാണ് റിപ്പോര്ട്ടുകള് സൂചിപ്പിക്കുന്നത്. അഞ്ച് ദിവസത്തെ മഴ പോലും 15,000 കോടി രൂപ ചെലവില് നിര്മ്മിച്ച എക്സ് പ്രസ്സ് വേയ്ക്ക് താങ്ങാനാവുന്നില്ലേ എന്നാണ് വരുണ് ഗാന്ധി ട്വീറ്റില് ചോദിച്ചത്. റോഡിന്റെ ഗുണനിലവാരത്തെക്കുറിച്ച് ഗുരുതരമായ ചോദ്യങ്ങള് ഉയരുന്നുവെന്നും അദ്ദേഹം കുറിച്ചു. പദ്ധതിയുമായി ബന്ധപ്പെട്ട എഞ്ചിനീയര്മാര്, ഉത്തരവാദിത്തപ്പെട്ട കമ്പിനികള് എന്നിവരെ വിളിച്ചുവരുത്തി അവര്ക്കെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു.