ബെംഗളുരു: കര്ണാടക ബിജെപിയിലെ പ്രതിസന്ധി തുടരുന്നു. ലക്ഷ്മണ് സാവഡി പാര്ട്ടി പ്രാഥമിക അംഗത്വം രാജി വച്ചതിന് പിന്നാലെ ബിജെപി എംഎല്സി ആര് ശങ്കറും പാര്ട്ടി വിട്ടു. ഇത്തവണയും സീറ്റ് നല്കാതിരുന്നതോടെയാണ് ശങ്കര് പാര്ട്ടി വിട്ടത്. റാണെബെന്നൂരില് നിന്ന് ശങ്കര് വീണ്ടും സ്വതന്ത്രനായി മത്സരിക്കും. സിറ്റിംഗ് എംഎല്എ അരുണ് കുമാറിനാണ് ബിജെപി റാണെബെന്നൂരില് വീണ്ടും സീറ്റ് നല്കിയത്.
അതേസമയം സീറ്റ് ലഭിക്കാത്തതിന് പിന്നാലെ മാധ്യമങ്ങള്ക്ക് മുന്നില് പൊട്ടിക്കരഞ്ഞ് ബിജെപി എംഎല്എ രഘുപതി ഭട്ട്. ഉഡുപ്പിയില് ബിജെപി വെട്ടിയ സിറ്റിംഗ് എംഎല്എ രഘുപതി ഭട്ട് മാധ്യമങ്ങള്ക്ക് മുന്നില് വികാരാധീനനാവുകയായിരുന്നു. നേരത്തേ പറഞ്ഞിരുന്നെങ്കില് താന് സ്വയം മാറി നിന്നേനെയെന്ന് രഘുപതി ഭട്ട് പറഞ്ഞു. പാര്ട്ടി തന്നോട് പെരുമാറിയ രീതിയാണ് തന്നെ ദുഃഖിപ്പിക്കുന്നത്. ഇത്ര കാലം പാര്ട്ടിയോട് എല്ലാ വിധ കൂറും പുലര്ത്തിയെന്നും രഘുപതി ഭട്ട് പറഞ്ഞു.
