ലഖ്നൗ: ഉത്തർപ്രദേശിലെ ഹർദോയ് ജില്ലയിൽ വൈദ്യുത പോസ്റ്റ് ദേഹത്ത് വീണ് വിദ്യാര്ത്ഥിനിക്ക് ദാരുണാന്ത്യം. രാഗിണി എന്ന 14 വയസ്സുകാരിയാണ് ദാരുണമായി മരണപ്പെട്ടത്. പലചരക്ക് കടയിൽ സാധനങ്ങൾ ഇറക്കുന്നതിനിടെ പിന്നിലേക്ക് എടുക്കുകയായിരുന്ന ട്രക്ക് അശ്രദ്ധമൂലം വൈദ്യുതി ലൈനിൽ കുടുങ്ങിയതാണ് അപകടത്തിന് കാരണമായത്. വീട്ടുസാധനങ്ങള് വാങ്ങാനായി സുഹൃത്തിനൊപ്പം റോഡിലൂടെ നടന്നുപോവുകയായിരുന്ന രാഗിണിയുടെ ദേഹത്തേക്ക് പോസ്റ്റ് വീഴുകയായിരുന്നു.
സംഭവസ്ഥലത്തുവെച്ചുതന്നെ കുട്ടി മരിച്ചു. ഒപ്പമുണ്ടായിരുന്ന സുഹൃത്ത് തലനാരിഴയ്ക്കാണ് അപകടത്തില് നിന്നും രക്ഷപ്പെട്ടത്. സംഭവത്തിന്റെ സിസിടിവി ദൃശ്യങ്ങള് പുറത്ത് വന്നിട്ടുണ്ട്.
ട്രക്ക് ഇടിച്ചാണ് പോസ്റ്റ് മറിഞ്ഞത്. സമീപത്തെ പലചരക്ക് കടയില് സാധനങ്ങള് ഇറക്കുന്നതിനിടെ റിവേഴ്സ് എടുക്കുകയായിരുന്ന ട്രക്ക് മുകളിലൂടെയുള്ള വൈദ്യുതി ലൈനില് കുടുങ്ങുകയും തുടര്ന്ന് മുന്നോട്ടെടുത്തപ്പോള് റോഡരികിലുണ്ടായിരുന്ന വൈദ്യുതി പോസ്റ്റില് ഇടിക്കുകയുമായിരുന്നു എന്ന് ദൃക്സാക്ഷികൾ പറയുന്നു. ഇടിയുടെ അഘാതത്തില് മറിഞ്ഞ പോസ്റ്റ് കുട്ടിയുടെ ദേഹത്തേക്കാണ് വീണത്. സംഭവത്തിന് പിന്നാലെ പോലീസ് സ്ഥലത്തെത്തുകയും മൃതദേഹം പോസ്റ്റ്മോര്ട്ടത്തിനായി അയക്കുകയും ചെയ്തു. വിഷയത്തിൽ അന്വേഷണം നടക്കുന്നുണ്ടെന്നും പരാതി ലഭിച്ചാലുടൻ നിയമനടപടി സ്വീകരിക്കുമെന്നും എസ്.എച്ച്.ഒ. മാർക്കണ്ഡേ സിംഗ് പറഞ്ഞു. സംഭവത്തിന്റെ സി.സി.ടി.വി. ദൃശ്യങ്ങൾ വൈറലായിട്ടുണ്ട്.
