തിരുവനന്തപുരം: സംസ്ഥാന സര്ക്കാര് ജനങ്ങളെ നോക്കി കൊഞ്ഞനം കുത്തുകയാണെന്നന്ന് പ്രതിപക്ഷ നേതാവ് വി ഡി സതീശന്. വീണ്ടും വിദേശ പര്യടത്തിനൊരുങ്ങുന്ന മുഖ്യമന്ത്രിയെയും മന്ത്രിമാരേയും വിമര്ശിച്ചാണ് പ്രതിപക്ഷ നേതാവിന്റെ പ്രസ്താവന. സാമ്പത്തിക പ്രതിസന്ധി രൂക്ഷമായക്കാലത്ത് കോടികള് ചെലവാക്കി വിദേശ ടൂര് നടത്തുന്ന മുഖ്യമന്ത്രിയുടെ തൊലിക്കട്ടി അപാരമാണെന്ന് പ്രതിപക്ഷ നേതാവ് വിമര്ശിച്ചു. വികസന പ്രവര്ത്തനങ്ങളെല്ലാം സ്തംഭിച്ച് നില്ക്കുന്ന കടം എടുത്തിട്ടും എടുത്തിട്ടും തീരാത്ത പ്രതിസന്ധിയിലേക്ക് കേരളം കൂപ്പുകുത്തുമ്പോള് സര്ക്കാരിന്റെ രണ്ടാം വാര്ഷികം ആഘോഷിക്കാനായി 125 കോടി അനുവദിക്കാന് ഈ മുഖ്യമന്ത്രിക്കല്ലാതെ മറ്റാര്ക്കും തൊലിക്കട്ടി ഉണ്ടാകുമെന്ന് കരുതുന്നില്ലെന്ന് വി ഡി സതീശന് പറഞ്ഞു.
അതേസമയം വീണ്ടും വിദേശയാത്ര നടത്താന് ഒരുങ്ങിയിരിക്കുകയാണ് മുഖ്യമന്ത്രിയും മന്ത്രിമാരും. കടുത്ത സാമ്പത്തിക പ്രതിസന്ധിയ്ക്കിടെയാണ് വീണ്ടും വിദേശയാത്ര നടത്താന് മുഖ്യമന്ത്രിയും മന്ത്രിമാരും ഒരുങ്ങിയിരിക്കുന്നത്. അമേരിക്കയിലും സൗദി അറേബ്യയിലും നടക്കുന്ന ലോക കേരള സഭയുടെ മേഖല സമ്മേളങ്ങളില് പങ്കെടുക്കുന്നതിന് വേണ്ടിയാണ് മുഖ്യമന്ത്രിയും മന്ത്രിമാരും വീണ്ടും വിദേശ സന്ദര്ശനം നടത്താനൊരുങ്ങുന്നത്. അമേരിക്കയിലെ സമ്മേളനം ജൂണിലാണ് തീരുമാനിച്ചിരിക്കുന്നത്. സെപ്റ്റംബറില് സൗദി സമ്മേളനവും നടക്കും. ഇതിനായി ചീഫ് സെക്രട്ടറി അധ്യക്ഷനായി സബ് കമ്മിറ്റി രൂപീകരിച്ചു.