തിരുവനന്തപുരം : തിങ്കള്‍ മുതല്‍ സംസ്ഥാനത്തെ സ്‌കൂളുകള്‍ പൂര്‍ണമായും തുറക്കും. ഫെബ്രുവരി 21 മാതൃഭാഷ ദിനമാണ്. അതുകൊണ്ട് തന്നെ അന്ന് എല്ലാ സ്കൂളുകളിലും മാതൃഭാഷ പ്രതിജ്ഞ നടത്തുമെന്ന് വിദ്യാഭ്യാസ മന്ത്രി വി.ശിവന്‍കുട്ടി പറഞ്ഞു. സ്കൂള് ശുചീകരണ പ്രവര്‍ത്തനങ്ങളില്‍ വിവിധ തൊഴിലാളി സംഘടനകള്‍, ഡി.വൈ.എഫ്‌.ഐ തുടങ്ങിയവര്‍ പങ്കെടുക്കും. 47 ലക്ഷം കുട്ടികള്‍ എത്തുമെന്നാണ് പ്രതീക്ഷിക്കുന്നത്. രക്ഷിതാക്കള്‍ ആശങ്കപ്പെടേണ്ട കാര്യമില്ല. തീരുമാനിച്ച പ്രകാരം പരീക്ഷകള്‍ കൃത്യമായി നടപ്പാക്കുമെന്നും മന്ത്രി പറഞ്ഞു.
രാവിലെ 11 മണിക്കാണ് സ്കൂളുകളില്‍ ഭാഷാപ്രതിജ്ഞയെടുക്കുക. കോവിഡ് മാനദണ്ഡങ്ങള്‍ പാലിച്ച്‌ ക്ലാസ് ടിസ്ഥാനത്തിലാണ് പ്രതിജ്ഞയെടുക്കുക. മലയാളം ഭാഷാപണ്ഡിതര്‍, എഴുത്തുകാര്‍, സാംസ്കാരിക നായകര്‍ തുടങ്ങിയവര്‍ വിവിധ സ്കൂളുകളിലെ ചടങ്ങുകളില്‍ പങ്കെടുക്കും. ജനപ്രതിനിധികളും സ്കൂള് തല ചടങ്ങുകളില്‍ ഉണ്ടാകും. വിദ്യാഭ്യാസ മന്ത്രി തിരുവനന്തപുരം പട്ടം ഗവണ്‍മെന്റ് ഗേള്‍സ് ഹൈസ്‌കൂളിലെ ചടങ്ങില്‍ പങ്കെടുക്കും.
