പന്തളം : അധ്യാപകർക്കുള്ള അവധിക്കാല അധ്യാപക പരിശീലനം പന്തളം ബിആർസി ഹാളിൽ പന്തളം തെക്കേക്കര ഗ്രാമപ്പഞ്ചായത്ത് പ്രസിഡൻറ് എസ്. രാജേന്ദ്ര പ്രസാദ് ഉദ്ഘാടനം ചെയ്തു. ഉപജില്ലാ വിദ്യാഭ്യാസ ഓഫീസർ പി. ഉഷ അധ്യക്ഷത വഹിച്ചു. ബ്ലോക്ക് പ്രോജക്ട് കോഡിനേറ്റർ പ്രകാശ് കെ.ജി. കുമാർ, സീനത്ത്, ഡി. ഗംഗ തുടങ്ങിയവർ പ്രസംഗിച്ചു. വിദ്യാഭ്യാസ ജില്ലയിലെ ഫിസിക്സ്, കെമിസ്ട്രി വിഷയങ്ങൾ പഠിപ്പിക്കുന്ന മുഴുവൻ ഹൈസ്കൂൾ അധ്യാപകർക്കും പന്തളം, ആറന്മുള സബ് ജില്ലകളിലെ ഒന്ന്, രണ്ട് ക്ലാസുകളിലേയും അടൂർ,
പന്തളം സബ് ജില്ലകളിലെ യുപി ഗണിതം, മലയാളം, ഇംഗ്ലീഷ് അധ്യാപകർക്കുമാണ് അഞ്ചുദിവസത്തെ പരിശീലനം നൽകുന്നത്. പുതിയ പാഠപുസ്തകങ്ങളിലെ നൂതനാശയങ്ങൾ ആധുനിക സാങ്കേതികവിദ്യകൾ ഉപയോഗിച്ച് ആകർഷകമായ രീതിയിൽ ക്ലാസുകൾ കൈകാര്യം ചെയ്യുന്നതിനെക്കുറിച്ചും സമഗ്ര ഗുണമേന്മ വർഷത്തിൽ ഓരോ കുട്ടികളെയും ഓരോ യൂണിറ്റായി കണ്ടുകൊണ്ട് അവർക്ക് നേടേണ്ട ശേഷികൾ പരിചയപ്പെടുത്തുകയും ചെയ്യും.
