ആലപ്പുഴ : ജില്ലയില് എല്ലാവരും രണ്ടു ഡോസ് കോവിഡ് വാക്സിന് എടുത്തു എന്ന് ഉറപ്പാക്കുന്നതിനായി പ്രത്യേക വാക്സിനേഷന് ക്യാമ്പുകള് നടത്താന് ജില്ലാ കളക്ടറുടെ അധ്യക്ഷയില് ചേര്ന്ന യോഗം തീരുമാനിച്ചു. ഡിസംബര് 29, 30, 31 ജനുവരി ഒന്ന് തീയതികളില് പ്രാഥമികാരോഗ്യ കേന്ദ്രങ്ങള് കേന്ദ്രീകരിച്ചാണ് ക്യാമ്പ്. പഞ്ചായത്ത് അംഗങ്ങള്, ആശാ – ഐ.സി.ഡി.എസ് പ്രവര്ത്തകര് എന്നിവരുടെ സഹകരണത്തോടെ ബോധവത്കരണം നടത്തി വാക്സിന് സ്വീകരിക്കാനുള്ളവരെ ക്യാമ്പുകളില് എത്തിക്കും. കുട്ടികള്ക്കുള്ള വാക്സിനേഷന് ആരംഭിക്കുന്നതിന് മുന്പായി മുതിര്ന്നവരുടെ വാക്സിനേഷന് പൂര്ത്തീകരിക്കാനാണ് ലക്ഷ്യമിടുന്നത്.
ജില്ലയില് കോവിഡ് രോഗികളുടെ എണ്ണം കൂടുന്ന സാഹചര്യമുണ്ടായാല് രോഗികളെ താമസിപ്പിക്കുന്നതിന് കൂടുതല് സജ്ജീകരണങ്ങള് ഒരുക്കും. ആലപ്പുഴ ബീച്ചിലെ ആള്കൂട്ടം നിയന്ത്രിക്കുന്നതിനായി സെക്ടറല് മജിസ്ട്രേറ്റുമാരെ നിയോഗിക്കും. ബീച്ചിലെ പ്രവേശനം രാത്രി 10 വരെയാക്കി നിയന്ത്രിക്കാനും യോഗത്തില് തീരുമാനമായി. ദുരന്ത നിവാരണ വിഭാഗം ഡെപ്യൂട്ടി കളക്ടര് ആശ സി ഏബ്രഹാം, ജില്ലാ മെഡിക്കല് ഓഫീസര് ഡോ.ജമുന വര്ഗീസ്, പഞ്ചായത്ത് ഡെപ്യുട്ടി ഡയറക്ടര് എസ്.ശ്രീകുമാര്, വിവിധ വകുപ്പ് ഉദ്യോഗസ്ഥര് തുടങ്ങിയവര് പങ്കെടുത്തു.
