വടകര : താലൂക്ക് ഓഫീസ് കത്തിനശിച്ച സംഭവത്തില് നടുക്കം വിട്ടുമാറിയില്ലെങ്കിലും ബാക്കിയായ ഫയലുകള് ഉണക്കിയും വേര്തിരിച്ചും ജീവനക്കാര്. അരലക്ഷത്തോളം ഫയലുകളാണ് കത്തിനശിച്ചത്. വെള്ളിയാഴ്ച പുലര്ച്ചെ അഞ്ചരയോടെയാണ് ഓഫീസില് തീപിടിച്ചത്. മണിക്കൂറുകള്ക്കകം ഓഫീസ് പൂര്ണമായും കത്തിനശിച്ചു. താലൂക്ക് ഓഫീസിലെയും 28 വില്ലേജ് ഓഫീസുകളിലെയും വിവിധ ഫയലുകളാണ് കത്തിനശിച്ചത്.
തീപിടിത്ത വിവരമറിഞ്ഞ് നൂറുകണക്കിന് പേര് ശനിയാഴ്ചയും താലൂക്ക് ഓഫീസ് സന്ദര്ശിക്കാനെത്തി. ഓഫീസിനു ചുറ്റും കയര് കെട്ടി അധികൃതര് അകത്തേക്കുള്ള സന്ദര്ശനം തടഞ്ഞു. ഫയലുകളും മറ്റു വസ്തുക്കളും താലൂക്ക് ഓഫീസിലെ ജീവനക്കാരുടെ നേതൃത്വത്തില് തരംതിരിച്ചെടുക്കുന്ന പ്രവൃത്തിയാണ് ശനിയാഴ്ച കാര്യമായി നടന്നത്. വെള്ളത്തില് കുതിര്ന്ന ഭാഗികമായി കത്തിയതും അല്ലാത്തതുമായ ഫയലുകള് ഷീറ്റ് വിരിച്ച് ഉണക്കാനിട്ടു.
2019 മുതലുള്ളത് ഇ-ഫയലുകള് ആയതിനാല് ആശ്വാസമുണ്ട്. താലൂക്ക് ഓഫീസ് താല്ക്കാലികമായി മറ്റൊരു കെട്ടിടത്തില് പ്രവര്ത്തിപ്പിക്കാനുള്ള നടപടിയും ആരംഭിച്ചിട്ടുണ്ട്. ട്രഷറി പ്രവര്ത്തിക്കുന്ന ബി.എസ്.എന്.എല് ഓഫീസിനടുത്ത് കൂടുതല് സൗകര്യപ്രദമായ മുറി കിട്ടുമോ എന്ന അന്വേഷണവും നടക്കുന്നുണ്ട്. താല്ക്കാലികമായി സൈക്ലോണ് ഷെല്ട്ടറും പരിഗണനയിലുണ്ട്. ഹെല്പ് ഡെസ്ക് ഉള്പ്പെടെ ആരംഭിച്ച് ജനങ്ങളുടെ ആശങ്കകള് പരിഹരിക്കാന് ശ്രമം തുടങ്ങിയിട്ടുണ്ട്.