കോഴിക്കോട്: കണ്ണൂരിലെ വൈദേകം റിസോര്ട്ടിന്റെ നടത്തിപ്പ് ചുമതല കേന്ദ്രമന്ത്രി രാജീവ് ചന്ദ്രശേഖറിന്റെ ഉടമസ്ഥതയിലുള്ള നിരാമയ റിട്രീറ്റ് കമ്പനി ഏറ്റെടുത്തു. ഏപ്രില് 15നാണ് ഇരുകമ്പനികളും ഇതുസംബന്ധിച്ച കരാറില് ഒപ്പുവെച്ചത്. ഏപ്രില് 16 മുതല് റിസോര്ട്ടിന്റെ നടത്തിപ്പ് അവകാശം പൂര്ണമായും നിരാമയ റീട്രീറ്റ്സിന് കൈമാറിയിരിക്കുകയാണ്. എല്.ഡി.എഫ് കണ്വീനര് ഇ.പി. ജയരാജന്റെ ഭാര്യയ്ക്കും മകനും ഓഹരി പങ്കാളിത്തമുള്ള റിസോര്ട്ട് എന്ന നിലയിലാണ് വാര്ത്തകളില് ഇടം പിടിച്ചത്. അതേസമയം റിസോര്ട്ടിന്റെ ഉടമസ്ഥാവകാശം കൈമാറിയിട്ടില്ലെന്നാണ് അറിയുന്നത്.
ഇ പി ജയരാജന്റെയും കുടുംബത്തിന്റെയും നിക്ഷേപത്തില് സംശയം പ്രകടിപ്പിച്ച് പി ജയരാജന് സിപിഐഎം സംസ്ഥാന കമ്മിറ്റിയില് ആരോപണം ഉന്നയിച്ചതോടെയാണ് വിവാദമുയര്ന്നത്. ഇ പി ജയരാജന്റെ ഭാര്യ ഇന്ദിരക്കും മകന് ജെയ്സണുമാണ് റിസോര്ട്ടിലെ പ്രധാന ഓഹരി ഉടമകള്. 9,199 ഓഹരികളാണ് ഇരുവര്ക്കുമായുള്ളത്. ഇന്ദിരയ്ക്ക് 81.99 ലക്ഷത്തിന്റേയും ജെയ്സണ് 10 ലക്ഷം രൂപയുടേയുമാണ് ഓഹരി. വിവാദത്തെ തുടര്ന്ന് റിസോര്ട്ടിലുള്ള ഓഹരികള് ഇ പി ജയരാജന്റെ കുടുംബം ഒഴിയുമെന്ന് പറഞ്ഞിരുന്നു.