കൊണ്ടോട്ടി: വന്ദേഭാരത് മിഷന് ആറാംഘട്ടത്തില് കേരളത്തിലേക്ക് കൂടുതല് സര്വീസുകള്. സംസ്ഥാനം ഉള്പ്പെടെ ഇന്ത്യയിലേക്ക് രണ്ട് മാസത്തിനുളളില് 1,561 സര്വീസുകളാണ് പ്രഖ്യാപിച്ചത്. സൗദി അറേബ്യ, കുവൈറ്റ്, ബഹ്റൈന്, ഖത്തര്, യുഎഇ രാജ്യങ്ങളില് നിന്നാണ് കേരളത്തിലേക്ക് സെപ്റ്റംബര്, ഒക്ടോബര് മാസങ്ങളില് അധിക സ ര്വീസുകള് പ്രഖ്യാപിച്ചിരിക്കുന്നത്.
കുവൈറ്റില് നിന്നാണ് കൂടുതല് സര്വീസുകള്. നാലു വിമാനത്താവളങ്ങളിലേക്കായി 39 വിമാനങ്ങളാണ് യാത്രക്കാരുമായി എത്തുക. ബഹ്റൈനില് നിന്ന് 10 സര്വീസുകളും സൗദി അറേബ്യയില് നിന്ന് ഒന്പത് സര്വീസുകളാണ് ഉള്ളത്. ഈ മാസം 14 വരെ സൗദിയില് നിന്ന് ഇന്ത്യയിലേക്ക് ഷെഡ്യൂള് ചെയ്ത 19 വിമാനങ്ങളില് ഒന്പത് സര്വീസുകളും കേരളത്തിലേക്കാണ്. മൂന്ന് വിമാനങ്ങള് കരിപ്പൂരിലേക്കും മൂന്നെണ്ണം തിരുവനന്തപുരത്തേക്കും രണ്ട് സര്വീസുകള് കൊച്ചിയിലേക്കും ഒരെണ്ണം കണ്ണൂരിലേക്കുമാണ് ഷെഡ്യൂള് ചെയ്തിരിക്കുന്നത്.
ഈ മാസം അഞ്ച്, ഏഴ് തീയതികളില് ദമാമില് നിന്നും 13ന് റിയാദില് നിന്നുമാണ് പ്രവാസികളുമായി വിമാനങ്ങള് കരിപ്പൂരിലെത്തുക. നാല് ,13 തീയതികളില് ദമാമില് നിന്നും ഏഴാം തീയതി റിയാദില് നിന്നുമാണ് തിരുവനന്തപുരത്തേക്ക് വിമാനങ്ങള് എത്തുക.
